ເພື່ອເຮັດໃຫ້ການນຳໃຊ້ແບບຟອມໃບອະນຸຍາດນຳເຂົ້າ ແລະ ໃບອະນຸຍາດສົ່ງອອກສິນຄ້າ ມີຄວາມເປັນເອກະພາບໃນການຈັດຕັ້ງປະຕິບັດ, ສະດວກງ່າຍດາຍ, ຫຼຸດຜ່ອນເວລາ ແລະ ຂັ້ນຕອນໃນການດຳເນີນເອກະສານ ເໝາະສົມກັບສະພາບຕົວຈິງໃນປະຈຸບັນ, ກະຊວງອຸດສາຫະກຳ ແລະ ການຄ້າ ອອກ ແຈ້ງການ ກ່ຽວກັບການນຳໃຊ້ແບບຟອມໃບອະນຸຍາດນຳເຂົ້າ, ໃບອະນຸຍາດສົ່ງອອກສິນຄ້າ ສະບັບປັບປຸງໃໝ່ ເລກທິ 0472/ອຄ. ກຂອ , ລົງວັນທີ 10 ມີນາ 2016 ເຖິງບັນດາພະແນກອຸດສາຫະກໍາ ແລະ ການຄ້າ ແຂວງ, ນະຄອນຫຼວງວຽງຈັນ ເພື່ອນຳໃຊ້ແບບຟອມໃບອະນຸຍາດນຳເຂົ້າ ແລະ ໃບອະນຸຍາດສົ່ງອອກສິນຄ້າ ສະບັບປັບປຸງໃໝ່ ໃນຂອບເຂດທົ່ວປະເທດ.
ໃນໄລຍະຂ້າມຜ່ານ ເພື່ອຫັນໄປສູ່ການອອກອະນຸຍາດແບບທັນສະໄໝ (Electronic-License), ການນຳໃຊ້ແບບຟອມໃບອະນຸຍາດ ແມ່ນສາມາດເລືອກນຳໃຊ້ໄດ້ທັງສອງລະບົບໄປພ້ອມໆກັນ ຈົນກວ່າທຸກພາກສ່ວນຈະມີຄວາມພ້ອມຄື: (1) ລະບົບເກົ່າ (ຊື້ແບບຟອມນຳຂະແໜງອຸດສາຫະກຳ ແລະ ການຄ້າ ເພື່ອໄປປະກອບ) ແລະ (2) ລະບົບໃໝ່ (ດາວໂຫຼດຜ່ານສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ (LTP). ພາຍຫຼັງປະກອບແບບຟອມຖືກຕ້ອງຄົບຖ້ວນແລ້ວ ແມ່ນມາຍື່ນຂໍອະນຸມັດ ແລະ ຊໍາລະຄ່າທຳນຽມຕາມພາຍຫຼັງ ນຳຂະແໜງອຸດສາຫະກຳ ແລະ ການຄ້າ).
ແບບຟອມໃບອະນຸຍາດນຳເຂົ້າ ແລະ ໃບອະນຸຍາດສົ່ງອອກ ສະບັບປັບປຸງໃໝ່ ແມ່ນເລີ່ມນໍາໃຊ້ຕັ້ງແຕ່ວັນທີ 1 ເມສາ 2016 ເປັນຕົ້ນໄປ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.