ຂໍ້ຕົກລົງ ວ່າດ້ວຍ ລາຍການສິນຄ້າເກືອດຫ້າມການນຳເຂົ້າ ຫຼື ສົ່ງອອກ, ເລກທີ 0848/ອຄ, ລົງວັນທີ 13 ກັນຍາ 2021.

ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິິປະໄຕ ເອກະພາບ ວັດທະນະຖາວອນ

ກະຊວງອຸດສາຫະກຳ ແລະ ການຄ້າ ເລກທີ 0848/ອຄ
ນະຄອນຫຼວງວຽງຈັນ, ວັນທີ 13 ກັນຍາ 2021

ຂໍ້ຕົກລົງ

ວ່າດ້ວຍ ລາຍການສິນຄ້າເກືອດຫ້າມການນຳເຂົ້າ ຫຼື ສົ່ງອອກ

ອີງຕາມ ດຳລັດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງອຸດສາຫະກຳ ແລະ ການຄ້າ ເລກທີ 230/ນຍ, ລົງວັນທີ 24 ກໍລະກົດ 2017;
ອີງຕາມ ດຳລັດ ວ່າດ້ວຍການນຳເຂົ້າ ແລະ ການສົ່ງອອກສິນຄ້າ ເລກທີ 114/ລບ, ລົງວັນທີ 06 ເມສາ 2011;
ອີງຕາມ ໜັງສືສະເໜີຂອງ ກົມການນຳເຂົ້າ ແລະ ສົ່ງອອກ ເລກທີ 3015/ກຂອ, ລົງວັນທີ 08 ກັນຍາ 2021.

ລັດຖະມົນຕີ ກະຊວງອຸດສາຫະກໍາ ແລະ ການຄ້າ ອອກຂໍ້ຕົກລົງ:

ມາດຕາ 1 ຈຸດປະສົງ

ຂໍ້ຕົກລົງສະບັບນີ້ ວາງອອກເພື່ອຜັນຂະຫຍາຍ ມາດຕາ 11 ຂອງ ດຳລັດວ່າດ້ວຍການນຳເຂົ້າ ແລະ ການສົ່ງອອກສິນຄ້າ ເລກທີ 114/ລບ, ລົງວັນທີ 06 ເມສາ 2011.

ມາດຕາ 2 ລາຍການສິນຄ້າເກືອດຫ້າມການນຳເຂົ້າ ຫຼື ສົ່ງອອກ

ລາຍການສິນຄ້າເກືອດຫ້າມການນຳເຂົ້າ ຫຼື ສົ່ງອອກ ແມ່ນປະເພດສິນຄ້າທີ່ຫ້າມນຳເຂົ້າ ຫຼື ສົ່ງອອກ ເພື່ອປົກປ້ອງ ຄວາມໝັ້ນຄົງຂອງຊາດ, ຄວາມເປັນລະບຽບຮຽບຮ້ອຍຂອງສັງຄົມ, ສິນລະທຳ, ວັດທະນະທຳ, ຊີວິດ ຫຼື ສຸຂະພາບຂອງ ຄົນ, ສັດ ຫຼື ພືດ, ເພື່ອປົກປັກຮັກສາມໍຣະດົກແຫ່ງຊາດ, ຊັບພະຍາກອນທຳມະຊາດ ຫຼື ເພື່ອປະຕິບັດຕາມສົນທິສັນຍາ ທີ່ ສປປ ລາວ ເປັນພາຄີ.

ມາດຕາ 3 ຕາຕະລາງລາຍການສິນຄ້າເກືອດຫ້າມການນຳເຂົ້າ ຫຼື ສົ່ງອອກ

ຕາຕະລາງລາຍການສິນຄ້າເກືອດຫ້າມການນຳເຂົ້າ ຫຼື ສົ່ງອອກ ແມ່ນອີງຕາມລະຫັດສາລະບານອັດຕາ ພາສີ ຊຶ່ງໄດ້ຈັດແບ່ງເປັນ ສອງຕາຕະລາງ ຄື: ຕາຕະລາງລາຍການສິນຄ້າເກືອດຫ້າມການນຳເຂົ້າ ແລະ ຕາຕະ ລາງລາຍການສິນຄ້າເກືອດຫ້າມການສົ່ງອອກ ໂດຍມີລາຍລະອຽດ ດັ່ງນີ້:

ຕາຕະລາງລາຍການສິນຄ້າເກືອດຫ້າມການນໍາເຂົ້າ

ລ/ດ	ລະຫັດພາສີ	ລາຍການສິນຄ້າ	ເຫດຜົນການຄຸ້ມຄອງ	ນິຕິກຳອ້າງອີງ	ຂະແໜງການຄຸ້ມຄອງ
01		ເຄມີອັນຕະລາຍປະເພດໜຶ່ງ ທີ່ນອນໃນບັນຊີເຄມີອຸດສາ ຫະກໍາ ຂອງກະຊວງອຸດສາ ຫະກຳ ແລະ ການຄ້າ	ເພື່ອປົກປ້ອງສຸຂະພາບ, ຄວາມປອດໄພຂອງຄົນ ແລະ ສິ່ງແວດລ້ອມ	ສົນທິສັນຍາວ່າດ້ວຍການເກືອດຫ້າມອາວຸດເຄມີ (Chemical Weapons Convention); ສົນທິສັນຍາຣອດເຕີດຳ (Rotterdam Convention); ສົນທິສັນຍາສຕອກໂຮມ (Stockholm Convention); ອະນຸສັນຍາມົງເຣອານ (Montreal Protocol); ກົດໝາຍວ່າດ້ວຍການຄຸ້ມຄອງ ເຄມີ ເລກທີ 07/ສພຊ; ລົງວັນທີ 10 ພະຈິກ 2016; ຂໍ້ຕົກລົງວ່າດ້ວຍບັນຊີເຄມີອຸດສາຫະກໍາ ເລກທີ 0220/ອຄ.ກອຫ, ລົງວັນທີ 23 ມີນາ 2021.	ກົມອຸດສາຫະກໍາ ແລະ ຫັດຖະກຳ (ກະຊວງອຸດສາຫະກໍາ ແລະ ການຄ້າ)
02	3601.00 3602.00 3603.00	ລູກປືນ-ລູກກະສູນ ແລະ ຊິ້ນສ່ວນປະກອບ ອາວຸດເສິກ ພາຫະນະຮັບໃຊ້ສົງຄາມ ປຸ໋ຍລະເບີດ ແລະ ອຸປະ ກອນກໍ່ແຕກ ດອກໄມ້ໄຟ	ເພື່ອປົກປັກຮັກສາຄວາມສະຫງົບ ແລະ ຄວາມໝັ້ນຄົງຂອງຊາດ	ປະມວນກົດໝາຍອາຍາ ເລກທີ 26/ສພຊ, ລົງວັນທີ 17 ພຶດສະພາ 2017; ຂໍ້ຕົກລົງວ່າດ້ວຍລະບຽບການຄຸ້ມຄອງ ແລະ ນຳໃຊ້ທາດລະເບີດຢູ່ ສປປ ລາວ ເລກທີ 39/ນຍ, ລົງ ວັນທີ 12 ກໍລະກົດ 2001.	ກົມອຸດສາຫະກຳປ້ອງກັນຊາດ, ກົມໃຫຍ່ ເຕັກນິກກອງທັບ, (ກະຊວງປ້ອງກັນປະເທດ)
03	1207.91.00.00 1211.40.00.00 1211.90.11.00 1211.90.12.00 1301.90.30.00 2939.11 2939.71.00.00	ຢາເສບຕິດເກືອດຫ້າມ ແລະ ອະນຸພັນຂອງຢາເສບຕິດ	ເພື່ອປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍຂອງສັງຄົມ ແລະ ປົກປ້ອງຊີວິດ, ສຸຂະພາບຂອງຄົນ	ປະມວນກົດໝາຍອາຍາ ເລກທີ 26/ສພຊ, ລົງວັນທີ 17 ພຶດສະພາ 2017; ກົດໝາຍວ່າດ້ວຍຢາເສບຕິດ ເລກທີ 10/ສພຊ, ລົງວັນທີ 25 ທັນວາ 2007; ດຳລັດຈັດຕັ້ງປະຕິບັດກົດໝາຍວ່າດ້ວຍຢາເສບຕິດ ເລກທີ 076/ນຍ, ລົງວັນທີ 20 ກຸມພາ 2009.	ຫ້ອງການກວດກາ ແລະ ຄວບຄຸມຢາເສບຕິດ, ກົມໃຫຍ່ຕຳຫຼວດ (ກະຊວງປ້ອງກັນຄວາມສະຫງົບ)
04		ປື້ມ, ສິ່ງພິມອື່ນທີ່ລາມົກອານາຈານ ແລະ ປື້ມອື່ນໆ ທີ່ແຕະຕ້ອງເຖິງຄວາມໝັ້ນຄົງຄວາມສະຫງົບຂອງຊາດ ແລະ ຂອງສັງຄົມ	ເພື່ອປົກປ້ອງວັດທະນະທຳອັນດີງາມຂອງຊາດ	ກົດໝາຍວ່າດ້ວຍການພິມຈຳໜ່າຍ ເລກທີ 05/ສພຊ, ລົງວັນທີ 09 ທັນວາ 2008.	ກົມວັນນະຄະດີ ແລະ ພິມຈຳໜ່າຍ (ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ)
05		ເຄື່ອງຈັກພິມເງິນ ເຄື່ອງຈັກຫຼອມເງິນຫຼຽນ ແທ່ນພິມທະນະບັດ ເຈ້ຍພິມເງິນ ນ້ຳມຶກສຳລັບພິມເງິນ ເບົ້າຫຼໍ່ຫຼຽນເງິນ	ເພື່ອປ້ອງກັນການປອມແປງ ຫຼື ຮຽນແບບທະນະບັດ ແລະ ເພື່ອຄວາມ ໝັ້ນຄົງທາງດ້ານເສດຖະ ກິດ ແລະ ຮັກສາສະຖຽນ ລະພາບຂອງເງິນຕາ	ກົດຫມາຍວ່າດ້ວຍທະນາຄານແຫ່ງ ສປປ ລາວ ສະບັບປັບປຸງ ເລກທີ 47/ສພຊ, ລົງວັນທີ 19 ມິຖຸນາ 2018.	ກົມນະໂຍບາຍເງິນຕາ (ທະນາຄານແຫ່ງ ສປປ ລາວ)
06		ສິ່ງເສດເຫຼືອທາງອີເລັກ ໂຕຣນິກ (e-Waste) ໝໍ້ໄຟເກົ່າ	ເພື່ອປົກປ້ອງສຸຂະພາບ, ຄວາມປອດໄພຂອງຄົນ ແລະ ສິ່ງແວດລ້ອມ	ສົນທິສັນຍາບາສເຊວ (Basel Convention); ແຈ້ງການກ່ຽວກັບຜົນການລົງຕິດຕາມກວດກາ ແລະ ເກັບກຳຂໍ້ມູນ ໂຮງງານແຍກ ແລະ ຫຼອມສິ່ງເສດເຫຼືອອີເລັກໂຕຣນິກ ແລະ ໝໍ້ໄຟເກົ່າ ໃນທົ່ວປະເທດ ເລກທີ 1855/ຫສນຍ.ກລຂ, ລົງວັນທີ 17 ພະຈິກ 2017.	ກົມອຸດສາຫະກໍາ ແລະ ຫັດຖະກຳ (ກະຊວງອຸດສາຫະກໍາ ແລະ ການຄ້າ)
07		ທຸກຊະນິດສັດນໍ້າ-ສັດປ່າ ແລະ ຊິ້ນສ່ວນຂອງມັນ ຕາມບັນຊີຫວງຫ້າມ ຂອງ ສົນທິສັນຍາ CITES	ເພື່ອປົກປ້ອງທຸກຊະນິດພັນທີ່ຖືກໄພຂົ່ມຂູ່ ແລະ ສ່ຽງຕໍ່ການສູນພັນ	ສົນທິສັນຍາວ່າດ້ວຍການຄ້າຂາຍຊະນິດພັນສັດປ່າ ແລະ ພືດປ່າທີ່ໃຫ້ຈະສູນພັນລະຫວ່າງປະເທດ (CITES); ກົດໝາຍວ່າດ້ວຍສັດນ້ຳ-ສັດປ່າ ເລກທີ 07/ສພຊ, ລົງວັນທີ 24 ທັນວາ 2008; ຂໍ້ຕົກລົງວ່າດ້ວຍການຮັບຮອງເອົາບັນຊີ ສັດນໍ້າ ແລະ ສັດປ່າ ປະເພດຫວງຫ້າມ ຫຼື ບັນຊີ I ແລະ ປະເພດຄຸ້ມຄອງ ຫຼື ບັນຊີ II ເລກ ທີ 08/ນຍ, ລົງວັນທີ 25 ກຸມພາ 2021; ຄຳສັ່ງວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາ ແລະ ສັດປ່າ ແລະ ພືດປ່າປະເພດຫວງຫ້າມ ເລກທີ 05/ນຍ, ລົງວັນທີ 08 ພຶດສະພາ 2018; ຂໍ້ຕົກລົງວ່າດ້ວຍການສ້າງ ແລະ ຄຸ້ມຄອງສວນສັດ, ຟາມ ສັດປ່າ, ສູນຟື້ນຟູ ແລະ ຂະຫຍາຍພັນສັດ ປ່າ ແລະ ສວນພືດປ່າ ເລກທີ 0188/ກປ, ລົງວັນທີ 03 ກຸມພາ 2019.	ກົມປ່າໄມ້ (ກະຊວງກະສິກໍາ ແລະ ປ່າໄມ້)
08		ເຄື່ອງປ່າຂອງດົງ ຕາມບັນ ຊີຫວງຫ້າມ ຂອງສົນທິສັນ ຍາ CITES	ເພື່ອປົກປ້ອງທຸກຊະນິດພັນທີ່ຖືກໄພຂົ່ມຂູ່ ແລະ ສ່ຽງຕໍ່ການສູນພັນ	ສົນທິສັນຍາວ່າດ້ວຍການຄ້າຂາຍຊະນິດພັນສັດປ່າ ແລະ ພືດປ່າ ທີ່ໃກ້ຈະສູນພັນລະຫວ່າງປະເທດ (CITES); ຄຳສັ່ງວ່າດ້ວຍການເພີ່ມທະວີ ຄວາມເຂັ້ມງວດໃນການຄຸ້ມຄອງ ແລະ ກວດກາ ສັດປ່າ ແລະ ພືດ ປ່າປະເພດຫວງຫ້າມ ເລກທີ 05/ນຍ, ລົງວັນທີ 08 ພຶດສະພາ 2018; ຂໍ້ຕົກລົງວ່າດ້ວຍການສ້າງ ແລະ ຄຸ້ມຄອງສວນສັດ, ຟາມ ສັດປ່າ, ສູນຟື້ນຟູ ແລະ ຂະຫຍາຍພັນສັດ ປ່າ ແລະ ສວນພືດປ່າ ເລກທີ 0188/ກປ, ລົງວັນທີ 3 ກຸມພາ 2019; ຂໍ້ຕົກລົງວ່າດ້ວຍການກຳນົດບັນຊີໄມ້ I, II ແລະ III ເລກທີ 0448/ກປ, ລົງວັນທີ 6 ເມສາ 2021; ຂໍ້ຕົກລົງວ່າດ້ວຍການກຳນົດບັນຊີ ເຄື່ອງປ່າຂອງດົງ I, II ແລະ III ເລກທີ 0279/ກປ, ລົງວັນທີ 19 ກຸມພາ 2020.	ກົມປ່າໄມ້ (ກະຊວງກະສິກຳ ແລະ ປ່າໄມ້)
09	2612	ແຮ່ທາດກຳມັນຕະພາບລັງ ສີທຸກຊະນິດ	ເພື່ອປົກປັກຮັກສາຄວາມສະຫງົບ ແລະ ຄວາມໝັ້ນຄົງຂອງຊາດ	ກົດໝາຍວ່າດ້ວຍແຮ່ທາດ ສະບັບປັບປຸງ ເລກທີ 31/ສພຊ, ລົງວັນ ທີ 31 ທັນວາ 2017; ດຳລັດວ່າດ້ວຍການສົ່ງອອກຜະ ລິດຕະພັນແຮ່ທາດ ເລກທີ 90/ນຍ, ລົງວັນທີ 09 ມິຖຸນາ 2008. ຂໍ້ຕົກລົງວ່າດ້ວຍລະບຽບການຂໍ ອະນຸຍາດນຳເຂົ້າ ແລະ ສົ່ງອອກ ແຮ່ທາດ ແລະ ຜະລິດຕະພັນແຮ່ ທາດ ເລກທີ 0352/ພບ, ລົງວັນ ທີ 13 ມີນາ 2012; ຂໍ້ຕົກລົງວ່າດ້ວຍການຊື້-ຂາຍ ແຮ່ທາດ ແລະ ຜະລິດຕະພັນແຮ່ທາດ ເລກທີ 0484/ພບ, ລົງວັນທີ 20 ເມສາ 2012.	ກົມຄຸ້ມຄອງບໍ່ແຮ່ (ກະຊວງພະລັງານ ແລະ ບໍ່ແຮ່)
10		ຢາປາບສັດຕູພືດປະເພດ ອັນຕະລາຍຮ້າຍແຮງ ແລະ ຮ້າຍແຮງສູງ	ເພື່ອປົກປ້ອງສຸຂະພາບ, ຄວາມປອດໄພຂອງຄົນ ແລະ ສິ່ງແວດລ້ອມ ແລະ ເພື່ອສອດຄ່ອງກັບລະ ບຽບການຂອງສົນທິສັນ ຍາ ທີ່ ສປປ ລາວ ເປັນ ພາຄີ.	ສົນທິສັນຍາຣອດເຕີດຳ (Rotterdam Convention); ສົນທິສັນຍາສຕອກໂຮມ (Stockholm Convention); ກົດໝາຍວ່າດ້ວຍການຄຸ້ມຄອງ ເຄມີ ເລກທີ 07/ສພຊ, ລົງວັນທີ 10 ພະຈິກ 2016; ດຳລັດວ່າດ້ວຍການຄຸ້ມຄອງຢາ ປາບສັບຕູພືດໃນ ສປປ ລາວ ເລກທີ 258/ລບ, ລົງວັນທີ 24 ສິງຫາ 2017; ຂໍ້ຕົກລົງວ່າດ້ວຍການຄຸ້ມຄອງ ຢາປາບສັດຕູພືດໃນ ສປປ ລາວ ເລກທີ 2860/ກປ, ລົງວັນທີ 11 ມິຖຸນາ 2010.	ກົມປູກຝັງ (ກະຊວງກະສິກຳ ແລະ ປ່າໄມ້)
11		ອຸປະກອນຕັດຄື້ນສັນ ຍານຄວາມຖີ່ (Radio Frequency Jammer) ອຸປະກອນຊິມບອກສ (Simbox Equipment) ໂທລະສັບດັກຟັງ (ສຽງ, ຂໍ້ມູນ)(Spy Phone (Voice, Data))	ເພື່ອປົກປັກຮັກສາຄວາມສະຫງົບ ແລະ ຄວາມໝັ້ນຄົງຂອງຊາດ	ກົດໝາຍວ່າດ້ວຍໂທລະຄົມມະ ນາຄົມ ເລກທີ 09/ສພຊ, ລົງວັນ ທີ 21 ທັນວາ 2011; ກົດໝາຍວ່າດ້ວຍເຕັກໂນໂລຊີ ການສື່ສານຂໍ້ມູນຂ່າວສານ ເລກ ທີ 02/ສພຊ, ລົງວັນທີ 7 ພະຈິກ 2016; ກົດໝາຍວ່າດ້ວຍຄື້ນຄວາມຖີ່ວິ ທະຍຸສື່ສານ ເລກທີ17/ສພຊ, ລົງ ວັນທີ 05 ພຶດສະພາ 2017; ຂໍ້ຕົກລົງວ່າດ້ວຍການນຳເຂົ້າແລະ ຈຳໜ່າຍອຸປະກອນໄອຊີທີ ເລກທີ 3201/ປທສ, ລົງວັນທີ 16 ພະ ຈິກ 2016; ບັນຊີລາຍການອຸປະກອນໄອຊີທີ ເລກທີ 1504/ຫກຊ, ລົງວັນທີ 20 ມິຖຸນາ 2018.	ກະຊວງເຕັກໂນໂລຊີ ແລະ ການສື່ສານ
12		ຜະລິດຕະພັນຢາສູບໄຟຟ້າ ແລະ ຢາສູບຊີຊາ	ເພື່ອປົກປ້ອງສຸຂະພາບຂອງຄົນ ແລະ ປ້ອງກັນການມົ້ວສຸມສິ່ງເສບຕິດ	ແຈ້ງການກ່ຽວກັບການສະເໜີຫ້າມການນຳເຂົ້າ, ຈຳໜ່າຍ ແລະ ບໍລິໂພກຢາສູບໄຟຟ້າ ແລະ ຢາສູບຊີຊາ ໃນ ສປປ ລາວ ເລກທີ 1297/ຫສນຍ.ກຄສ, ລົງວັນທີ 13 ສິງຫາ 2018.	ກົມອະນາໄມ ແລະ ສົ່ງເສີມສຸຂະພາບ (ກະຊວງສາທາລະນະ ສຸກ)

ໝາຍເຫດ: ສຳລັບສິນຄ້າທີ່ກຳນົດໃນ ຕາຕະລາງລາຍການສິນຄ້າເກືອດຫ້າມການນຳເຂົ້າແລະ ຕາຕະລາງລາຍການ ສິນຄ້າເກືອດຫ້າມການສົ່ງອອກ ໃນມາດຕາ 3 ຂອງຂໍ້ຕົກລົງສະບັບນີ້ ທີ່ບໍ່ໄດ້ກຳນົດລະຫັດພາສີ ຫຼື ກຳນົດແລ້ວ ແຕ່ບໍ່ຈະແຈ້ງ ຫຼື ບໍ່ຄົບຖ້ວນ ແມ່ນຂະແໜງການກ່ຽວຂ້ອງ ຈະສົມທົບກັບລັດຖະການພາສີ ໃນການຈັດເລກລະຫັດ ພາສີຂອງສິນຄ້າຕົວຈິງ ໃຫ້ຖືກຕ້ອງ ແລະ ສອດຄ່ອງກັບເນື້ອໃນລາຍລະອຽດຂອງສິນຄ້າ ຕາມທີ່ໄດ້ກຳນົດໃນສາ ລະບານອັດຕາພາສີ ຂອງ ສປປ ລາວ.

ມາດຕາ 4 ການນໍາເຂົ້າ ຫຼື ສົ່ງອອກ ສິນຄ້າທີ່ນອນໃນຕາຕະລາງລາຍການສິນຄ້າເກືອດຫ້າມການນຳເຂົ້າ ແລະ ສົ່ງອອກ

ສິນຄ້າທີ່ນອນໃນ ຕາຕະລາງລາຍການສິນຄ້າເກືອດຫ້າມການນຳເຂົ້າ ຫຼື ຕາຕະລາງລາຍການສິນຄ້າ ເກືອດຫ້າມການສົ່ງອອກ ທີ່ໄດ້ກໍານົດໃນມາດຕາ 3 ຂອງຂໍ້ຕົກລົງສະບັບນີ້ ແມ່ນບໍ່ສາມາດນໍາເຂົ້າ ຫຼື ສົ່ງ ອອກ ເພື່ອຈຸດປະສົງທາງດ້ານການຄ້າ, ຍົກເວັ້ນການນຳເຂົ້າ ຫຼື ສົ່ງອອກ ເພື່ອຈຸດປະສົງໃນການຄົ້ນຄວ້າ, ການພັດທະນາເຕັກໂນໂລຊີ, ການປ້ອງກັນ, ການສະກັດກັ້ນ ແລະ ການລະງັບອັນຕະລາຍທີ່ອາດເກີດຂຶ້ນຕໍ່ສຸຂະພາບ, ຊີວິດ, ຊັບສິນ, ສິ່ງແວດລ້ອມ ແລະ ການນຳໃຊ້ໃນວຽກງານປ້ອງກັນຊາດ, ປ້ອງກັນຄວາມສະຫງົບ ຕ້ອງໄດ້ຮັບອະນຸຍາດຈາກລັດຖະບານ.

ມາດຕາ 5 ການນໍາເຂົ້າ ຫຼື ສົ່ງອອກ ສິນຄ້າທີ່ບໍ່ນອນໃນຕາຕະລາງລາຍການສິນຄ້າເກືອດຫ້າມການນຳເຂົ້າ ແລະ ສົ່ງອອກ

ສິນຄ້າທີ່ບໍ່ນອນໃນຕາຕະລາງລາຍການສິນຄ້າເກືອດຫ້າມການນຳເຂົ້າ ຫຼື ຕາຕະລາງລາຍການສິນຄ້າ ເກືອດຫ້າມການສົ່ງອອກ ທີ່ໄດ້ກຳນົດໃນມາດຕາ 3 ຂອງຂໍ້ຕົກລົງສະບັບນີ້ ແມ່ນສາມາດນຳເຂົ້າ ເພື່ອຈຸດ ປະສົງທາງການຄ້າ ແຕ່ຕ້ອງດຳເນີນຂັ້ນຕອນການນຳເຂົ້າ ຫຼື ສົ່ງອອກ ຕາມລະບຽບການສະເພາະຂອງ ແຕ່ລະ ປະເພດສິນຄ້າ.

ມາດຕາ 6 ການປັບປຸງຕາຕະລາງລາຍການສິນຄ້າເກືອດຫ້າມການນຳເຂົ້າ ແລະ ສົ່ງອອກ

ການປັບປຸງຕາຕະລາງລາຍການສິນຄ້າເກືອດຫ້າມການນຳເຂົ້າ ແລະ ສົ່ງອອກ ແມ່ນການເພີ່ມ ຫຼື ຫຼຸດ ລາຍການສິນຄ້າທີ່ກຳນົດໃນມາດຕາ 3 ຂອງຂໍ້ຕົກລົງສະບັບນີ້.

ການປັບປຸງແຕ່ລະຄັ້ງ ຕ້ອງໄດ້ຮັບການອະນຸມັດຈາກ ລັດຖະມົນຕີກະຊວງອຸດສາຫະກຳ ແລະ ການຄ້າ ຕາມການຄົ້ນຄ້ວາ ແລະ ສະເໜີຂອງພາກສ່ວນທີ່ກ່ຽວຂ້ອງ.

ພາຍຫຼັງທີ່ໄດ້ປັບປຸງຕາຕະລາງລາຍການສິນຄ້າສໍາເລັດແລ້ວ ກະຊວງອຸດສາຫະກຳ ແລະ ການຄ້າ ຕ້ອງ ໄດ້ແຈ້ງໃຫ້ພາກສ່ວນທີ່ກ່ຽວຂ້ອງ ຊາບ ແລະ ຈັດຕັ້ງປະຕິບັດ.

ມາດຕາ 7 ການຈັດຕັ້ງປະຕິບັດ

ອບໃຫ້ ກົມການນຳເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ ເປັນເຈົ້າການປະສານ ສົມທົບກັບພາກສ່ວນກ່ຽວຂ້ອງ ໃນການຈັດຕັ້ງປະຕິບັດຂໍ້ຕົກລົງສະບັບນີ້ ໃຫ້ໄດ້ຮັບປະສິດທິຜົນສູງ.

ມາດຕາ 8 ຜົນສັກສິດ

ຂໍ້ຕົກລົງສະບັບນີ້ ມີຜົນສັກສິດ ພາຍຫຼັງລົງລາຍເຊັນ ແລະ ລົງຈົດໝາຍເຫດທາງລັດຖະການ ສິບຫ້າ ວັນ ເປັນຕົ້ນໄປ.

ຂໍ້ຕົກລົງສະບັບນີ້ ປ່ຽນແທນ ແຈ້ງການ ກ່ຽວກັບສິນຄ້າເກືອດຫ້າມການນຳເຂົ້າ ຫຼື ສົ່ງອອກ ເລກທີ 0973/ອຄ.ກຂອ, ລົງວັນທີ 25 ມີນາ 2011.

ລັດຖະມົນຕີິ

ປອ ຄໍາແພງ ໄຊສົມແພງ

#	ຫົວຂໍ້	ດາວໂຫຼດ
1	The Decision to prohibit import and export products, No. 0848/MOIC, date 13 September 2021.	PDF
2	ຂໍ້ຕົກລົງ ວ່າດ້ວຍ ລາຍການສິນຄ້າເກືອດຫ້າມການນຳເຂົ້າ ຫຼື ສົ່ງອອກ, ເລກທີ 0848/ອຄ, ລົງວັນທີ 13 ກັນຍາ 2021.	PDF

ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.

ຂໍ້ຕົກລົງ

ວ່າດ້ວຍ ລາຍການສິນຄ້າເກືອດຫ້າມການນຳເຂົ້າ ຫຼື ສົ່ງອອກ

Your opinion matters!

ຂອບໃຈ ສຳລັບຄຳຄິດເຫັນຂອງທ່ານ.