ສປປ ລາວ ແລະ ສປ ຈີນ ໄດ້ຮ່ວມລົງນາມໃນຂໍ້ກໍານົດ ເງື່ອນໄຂດ້ານສຸຂານາໄມ ແລະ ສຸຂານາໄມພືດ (SPS) ຂອງສິນຄ້າກະສິກໍາຈໍານວນໜຶ່ງ ເລີ່ມແຕ່ປີ 2012 ເປັນຕົ້ນມາ ຊຶ່ງລວມມີ: ບົດບັນທຶກ ກ່ຽວກັບ ຂໍ້ກໍານົດເງື່ອນໄຂ ການກວດກາສັດຕູພືດສາລີ ກ່ອນການນໍາເຂົ້າ ສປ ຈີນ ລົງນາມ ໃນວັນທີ 10 ມັງກອນ 2012; ຂໍ້ກໍານົດ ເງື່ອນໄຂດ້ານສຸຂານາໄມ ກ່ຽວກັບ ການສົ່ງອອກໝາກໂມ, ໝາກກ້ວຍ, ມັນຕົ້ນແຫ້ງ ຂອງ ສປປ ລາວ ໄປຍັງ ສປ ຈິີນ ລົງນາມໃນວັນທີ 26 ກັນຍາ 2013; ແລະ ຂໍ້ກໍານົດ ເງື່ອນໄຂດ້ານສຸຂານາໄມ ກ່ຽວກັບ ການສົ່ງອອກ ເຂົ້າ ຂອງ ສປປ ລາວ ໄປຍັງ ສປ ຈິີນ ລົງນາມໃນວັນທີ 5 ມັງກອນ 2015. ໝາຍຄວາມວ່າ ກ່ອນທີ່ຜູ້ສົ່ງອອກຂອງສປປ ລາວ ຈະສາມາດສົ່ງອອກສິນຄ້າກະສິກໍາດັ່ງກ່າວມານັ້ນ ໄປ ສປ ຈີນ ແມ່ນຕ້ອງປະຕິບັດຕາມບັນດາເງື່ອນໄຂທີ່ລະບຸໃນຂໍ້ກໍານົດດັ່ງກ່າວມານັ້ນຢ່າງເຄັ່ງຄັດ.
ສຳລັບ ເຂົ້າກີນ ແຕ່ລະປີ ສປ ຈີນ ໄດ້ກຳນົດໂກຕານໍາເຂົ້າລວມ ໃຫ້ແກ່ບັນດາປະເທດສະມາຊິກອົງການການຄ້າໂລກໃນຈຳນວນ 2,660,000 ໂຕນ ຊຶ່ງການພິຈາລະນາແມ່ນອີງຕາມຜູ້ໃດຍື່ນຂໍກ່ອນ ກໍຈະໄດ້ຮັບການພິຈາລະນາກ່ອນ ຫລື First come first serve. ໃນປີ 2015, ໃນຂອບການຮ່ວມມືສອງຝ່າຍ ສປ ຈີນ ໄດ້ແບ່ງ ໂກຕານຳເຂົ້າໃຫ້ແກ່ ສປປ ລາວໂດຍສະເພາະ ເປັນຈໍານວນ 8,000 ໂຕນ.
ສໍາລັບ ຢາງພາລາ ແມ່ນນອນໃນບັນຊີສິນຄ້າອ່ອນໄຫວຂອງ ສປ ຈີນ, ມີອັດຕາພາສີນໍາເຂົ້າ 20%. ເພື່ອເປັນການອຳນວຍຄວາມສະດວກໃຫ້ແກ່ການສົ່ງອອກສິນຄ້າດັ່ງກ່າວຈາກ ສປປ ລາວ ໄປ ສປ ຈີນ, ສປປ ລາວ ມີແຜນ ຈະສະເໜີຂໍ້ເຈລະຈາກ່ຽວກັບມາດຕະຖານ ສຸຂານາໄມ ແລະ ສຸຂານາໄມພືດ (SPS) ຂອງຢາງພາລາ ກັບ ສປ ຈີນ. ປະຈຸບັນ, ສປ ຈີນກໍາລັງລົງມາກວດຂັ້ນຕອນການຜະລິດຢາງພາລາຢູ່ ສປ ລາວ. ທາງຝ່າຍລາວແມ່ນກົມປູກຝັງ, ກະຊວງກະສິກໍາ ແລະ ປ່າໄມ້ ກໍາລັງຮ່າງສັນຍາສອງຝ່າຍກັບ ສປ ຈີນຢູ່ ຖ້າສໍາເລັດ ຢາງພາລາກໍຈະສາມາດສົ່ງອອກໄປ ສປ ຈີນໄດ້ຢ່າງເປັນທາງການ.
ສຳລັບ ໃບຢາສູບ ແມ່ນນອນໃນບັນຊີສິນຄ້າອອ່ນໄຫວຂອງ ສປ ຈີນ ເຊັ່ນກັນ ມີອັດຕາພາສີນໍາເຂົ້າ 10%. ປະຈຸບັນ ສປປ ລາວ ຍັງບໍ່ມີແຜນທີ່ຈະສະເໜີຂໍ້ເຈລະຈາເງື່ອນໄຂດ້ານສຸຂານາໄມ ແລະ ສຸຂານາໄມພືດ (SPS) ກັບ ສປ ຈີນ ເທື່ອ.
ແຫລ່ງຂໍ້ມູນ: ພະແນກການຄ້າດ້ານສິນຄ້າ, ກົມນະໂຍບາຍການຄ້າຕ່າງປະເທດ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.