ເພື່ອເປັນການເພີ່ມທະວີການຈັດຕັ້ງປະຕິບັດວຽກງານຄຸ້ມຄອງປ່າໄມ້, ທຸລະກິດໄມ້, ການຂຸດຄົ້ນໄມ້, ການປຸງແຕ່ງໄມ້ ແລະ ການຊື້-ຂາຍໄມ້ ໃຫ້ມີຄວາມເຂັ້ມງວດຕາມກົດໝາຍ ແລະ ລະບຽບການຕ່າງໆ ທີ່ລັດຖະບານ ໄດ້ວາງອອກມີຄວາມສັກສິດ, ທັງເປັນການສະກັດກັ້ນ, ຕ້ານ ແລະ ແກ້ໄຂປະກົດການຫຍໍ້ທໍ້ດ້ານຕ່າງໆ ໃນຂົງເຂດວຽກງານປ່າໄມ້ ໃຫ້ຫຼຸດລົງ ແລະ ໝົດໄປເທື່ອລະກ້າວ ໃນເດືອນພຶດສະພາທີ່ຜ່ານມາ ທ່ານນາຍົກລັດຖະມົນຕີ ໄດ້ອອກ ຄຳສັ່ງເລກທີ 15/ນຍ ລົງວັນທີ 13 ພຶດສະພາ 2016 ເຊິ່ງລະບຸໃຫ້ຢຸດຕິການສົ່ງອອກໄມ້ທີ່ຂຸດຄົ້ນອອກຈາກປ່າທຳມະຊາດ ໄປຕ່າງປະເທດ ໃນທຸກກໍລະນີຢ່າງເດັດຂາດ ແລະ ໃຫ້ປຸງແຕ່ງເປັນຜະລິດຕະພັນສຳເລັດຮູບຕາມມາດຖານທີ່ກະຊວງອຸດສາຫະກຳ ແລະ ການຄ້າວາງອອກ ເສຍກ່ອນຈຶ່ງສົ່ງອອກໄດ້.
ເພື່ອເປັນການຕິດຕາມຊຸກຍູ້ການຈັດຕັ້ງປະຕິບັດດັ່ງກ່າວ, ຫ້ອງວ່າການສຳນັກງານນາຍົກລັດຖະມົນຕີ ກໍໄດ້ອອກ ແຈ້ງການ ສະບັບເລກທີ 1345/ຫສນຍ.ກລຂ ລົງວັນທີ 7 ກັນຍາ 2016 ເຊິ່ງໄດ້ກຳນົດໃຫ້ຄະນະສະເພາະກິດຂັ້ນສູນກາງ ສົມທົບກັບ ຄະນະສະເພາະກິດຂອງແຂວງ ສືບຕໍ່ກວດກາລະອຽດບໍລິມາດໄມ້ຕົວຈິງ ທີ່ຂຸດຄົ້ນບໍ່ຖືກຕ້ອງຕາມລະບຽບກົດໝາຍແມ່ນໃຫ້ຍຶດເປັນຂອງລັດ ແລະ ໃຫ້ກວດກາຄືນໄມ້ທີ່ຂຸດຄົ້ນເກີນໂກຕ້າ ແລະ ຂຸດຄົ້ນບໍ່ຖືກເຂດກຳນົດໃຫ້ຂຸດຄົ້ນນັ້ນ ແມ່ນໃຫ້ຍຶດເປັນຂອງລັດ.
ສຳລັບການດຳເນີນການປະມູນຂາຍໄມ້ທີ່ຍຶດເປັນຂອງລັດ, ກະຊວງອຸດສາຫະກຳ ແລະ ການຄ້າ ໄດ້ອອກ ຄຳສັ່ງແນະນຳ ວ່າດ້ວຍ ແນະນຳການຈັດຕັ້ງປະມູນຂາຍໄມ້ທີ່ຍຶດເປັນຂອງລັດໃນຂອບເຂດທົ່ວປະເທດ ສະບັບເລກທີ 2071/ອຄ.ກຂອ, ລົງວັນທີ 14 ພະຈິກ 2016 ເຖິງຫົວໜ້າພະແນກ ອຸດສາຫະກຳ ແລະ ການຄ້າ ແຂວງ, ນະຄອນຫຼວງວຽງຈັນ ເພື່ອຄວາມເປັນເອກະພາບ ແລະ ເປັນບ່ອນອີງໃຫ້ແກ່ການຈັດຕັ້ງປະຕິບັດ. ຄຳສັ່ງແນະນຳສະບັບນີ້ ໄດ້ແນະນຳໃຫ້: 1) ໃຫ້ພະແນກອຸດສາຫະກຳ ແລະ ການຄ້າ ແຂວງ, ນະຄອນຫຼວງວຽງຈັນ ສົມທົບກັບຂະແໜງການທີ່ກ່ຽວຂ້ອງຂອງແຂວງ ແລະ ຄະນະ ຮັບຜິດຊອບການປະມູນໄມ້ຍຶດຂອງລັດໃນຂອບເຂດທົ່ວປະເທດ ທີ່ຖືກແຕ່ງຕັ້ງ ປະເມີນສະພາບ ແລະ ຄຸນນະພາບໄມ້ຕົວຈິງທີ່ຈະປະມູນ; 2) ໃຫ້ໂຄສະນາເຜີຍແຜ່ເປີດກວ້າງກ່ຽວກັບການປະມູນໄມ້ຍຶດຂອງລັດໃນຂອບເຂດທົ່ວປະເທດ ໂດຍຜ່ານສື່ຕ່າງໆ; 3) ເງື່ອນໄຂຂອງຜູ້ເຂົ້າປະມູນຊື້ໄມ້ ແລະ ຂັ້ນຕອນການຈັດຕັ້ງປະມູນຂາຍໄມ້ແມ່ນປະຕິບັດຕາມ ລະບຽບການຊື້-ຂາຍໄມ້ ເລກທີ 1726/ອຄ.ກຂອ ລົງວັນທີ 23 ສິງຫາ 2012; 4) ລາຄາທີ່ໃຊ້ໃນການປະມູນ ປະກອບມີ 3 ວີທີ ໃຫ້ນຳໃຊ້ຕາມຄວາມເໝາະສົມກັບສະພາບຕົວຈິງ; 5) ອາກອນທີ່ຜູ້ຊະນະການປະມູນໄມ້ຕ້ອງໄດ້ຖອກໃຫ້ລັດ; 6) ໄມ້ປະມູນທີ່ຈະປະມູນຂາຍ ຕ້ອງໄດ້ຈົດທະບຽນເປັນຊັບສິນຂອງລັດ ກັບ ຂະແໜງການເງິນແຂວງ ໂດຍການເຊັນຮ່ວມຢັ້ງຢືນຈາກຂະແໜງການທີ່ກ່ຽວຂ້ອງ; 7) ຄ່າສິ້ນເປືອງຕ່າງໆທີ່ເກີດຂຶ້ນຈາກການຍຶດ, ການເກັບຮັກສາໄມ້, ການຈັດປະມູນຂາຍໄມ້ ແລະ ຄ່າສິ້ນເປືອງອື່ນໆ ແມ່ນອະນຸຍາດໃຫ້ຫັກໄດ້ຈາກເງິນທີ່ໄດ້ຮັບຈາກການຂາຍໄມ້; 8) ກໍລະນີພົບຄວາມຫຍຸ້ງຍາກໃນການຈັດຕັ້ງປະຕິບັດ ແມ່ນໃຫ້ລາຍງານຂໍທິດກັບຂັ້ນເທິງ ເພື່ອແກ້ໄຂໃຫ້ທ່ວງທັນກັບສະພາບການ; 9) ພາຍຫຼັງທີ່ສຳເລັດການຂາຍໄມ້ແຕ່ລະຄັ້ງ ໃຫ້ຄະນະກຳມະການປະມູນຂາຍໄມ້ລາຍງານຜົນຂອງການປະມູນໄມ້ໃຫ້ ຄະນະນຳກະຊວງ ຮັບຊາບ.
ໃນການດຳເນີນການຈັດຕັ້ງປະມູນຂາຍໄມ້ທີ່ຍຶດເປັນຂອງລັດນັ້ນ ແຂວງໃດທີ່ມີຄວາມພ້ອມ ແມ່ນສາມາດດຳເນີນການປະມູນໄດ້ທັນທີ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.