ສາທາລະນະລັດ ປະຊາທິປະໄຕ ປະຊາຊົນລາວ​
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ

ກະຊວງ​ກະສິກໍາ ແລະ​ ປ່າໄມ້           ເລກທີ 4211/ກປ​
ນະຄອນຫຼວງ​ວຽງຈັນ, ວັນທີ 29 ພະຈິກ 2019.

ຂໍ້ຕົກລົງ
ວ່າດ້ວຍ ການນໍາເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ​ ຜະລິດຕະພັນ​ສັດ​ນໍ້າ

• ອີງຕາມ ​ກົດໝາຍວ່າດ້ວຍ​ການປະມົງ ​ສະບັບເລກທີ 03/ສພຊ,​ ລົງວັນທີ 09 ກໍລະກົດ 2009​;
• ອີງຕາມ ດໍາລັດຂອງນາຍົກລັດຖະມົນຕີ ສະບັບເລກທີ 99/ນຍ, ລົງວັນທີ 09 ມີນາ 2017 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງກະສິກໍາ ແລະ ປ່າໄມ້;
• ອີງຕາມ ໜັງ​ສື​ສະ​ເໜີຂອງ ກົມລ້ຽງສັດ ແລະ ການປະມົງ ສະບັບເລກທີ 3015/ກລປ, ລົງວັນທີ 23 ຕຸ​ລາ 2019;
• ອີງຕາມ ການຄົ້ນຄ້ວາ ແລະ ​ສະ​ເໜີຂອງ ກົມນະ​ໂຍບາຍ ​ແລະ​ ນິຕິ​ກໍາ ສະບັບເລກທີ 688/ກບນ, ລົງວັນທີ 20 ພະຈິກ 2019.

ລັດຖະມົນຕີ ກະຊວງ​ກະສິກໍາ ​ແລະ ປ່າ​ໄມ້ ອອກ​ຂໍ້​ຕົກລົງ:

ໝວດທີ 1
ບົດບັນຍັດ​ທົ່ວໄປ​

ມາດຕາ 1  ຈຸດປະສົງ​

ຂໍ້ຕົກລົງສະບັບນີ້ ກຳນົດຫຼັກການ, ລະບຽບການ ແລະ ມາດຕະການ ກ່ຽວກັບການຄວບຄຸມການນຳເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ ຢູ່ ສປປ ລາວ ເພື່ອປ້ອງກັນ ແລະ ສະກັດກັ້ນການເຂົ້າມາ, ກໍ່ຕົວ, ແຜ່ກະຈາຍຂອງພະຍາດ​ສັດນໍ້າ ແລະ ການທຳລາຍຈາກສັດນໍ້າຕ່າງແດນ ທີ່ເປັນອັນຕະລາຍຕໍ່ຊັບພະຍາກອນສັດນໍ້າພາຍໃນປະເທດ ແນໃສ່​ປົກປ້ອງ​ຊີວິດ, ສຸຂະພາບ​ຂອງຄົນ, ສັດນໍ້າ, ພັນສັດນໍ້າພື້ນເມືອງ ແລະ ສິ່ງແວດລ້ອມ ໃຫ້ມີຄວາມປອດໄພ ປະກອບສ່ວນ​ເຂົ້າໃນການຈັດຕັ້ງປະຕິບັດ ສັນຍາສຸຂານາໄມສັດ ແລະ ສຸຂານາໄມພືດ, ສັນຍາສາກົນ ທີ່ ສປປ ລາວ ເປັນພາຄີ.

​​ມາດຕາ 2  ການນໍາເຂົ້າ​, ສົ່ງອອກ ແລະ ສົ່ງຜ່ານ ​ສັດນໍ້າ​ ແລະ​ ຜະລິດຕະພັນ​ສັດນໍ້າ

ການນໍາເຂົ້າ, ສົ່ງອອກ ແລະ ສົ່ງຜ່ານ ​ສັດ​ນໍ້າ​ ແລະ ​ຜະລິດຕະພັນ​ສັດນໍ້າ​ ແມ່ນການຈັດຕັ້ງປະຕິບັດ ບັນດາລະບຽບການ​ກ່ຽວກັບຂັ້ນຕອນການອະນຸຍາດຂອງ ອົງການຄຸ້ມຄອງການປະມົງ ໃຫ້ແກ່ບຸກຄົນ, ນິຕິບຸກຄົນ ຫຼື ການຈັດຕັ້ງ ນໍາສັດນໍ້າ ຫຼື ​ຜະລິດຕະພັນ​ສັດນໍ້າ ເຂົ້າ, ອອກ ຫຼື ສົ່ງຜ່ານ ສປປ ລາວ ໂດຍຜ່ານດ່ານກວດກາສັດຕະວະແພດ.

ມາດຕາ 3  ການອະທິບາຍຄຳສັບ

ຄໍາສັບທີ່ນໍາໃຊ້ໃນຂໍ້ຕົກລົງສະບັບນີ້ ມີຄວາມໝາຍ ດັ່ງນີ້:

1. ສິນຄ້​າທີ່ຖືກຂົນສົ່ງ ໝາຍເຖິງ ​ລາຍການສັດນໍ້າ ແລະ ຜະລິດຕະພັນສັດນໍ້າ ທີ່ຖືກເຄື່ອນຍ້າຍ​ຈາກ​ປະ​ເທດ​ໜຶ່ງໄປອີກປະເທດໜຶ່ງ ທີ່ໄດ້ມີການບັນຈຸ, ຫຸ້ມຫໍ່ ແລະ ມີເອກະສານຢັ້ງຢືນດ້ານສຸ​ຂະ​ພາບ​ ຫຼື ສຸຂານາໄມຈາກອົງການຄຸ້ມຄອງຂອງປະເທດຕົ້ນທາງ;
2. ເຊື້ອ​ພະ​ຍາດສັດນໍ້າ ໝາຍເຖິງ ຈຸລິນຊີ, ແມ່ກາຝາກ ແລະ ເຊື້ອເຫັດ ໃດໜຶ່ງ ທີ່ເປັນສາເຫດ​ ຫຼື ເປັນຕົວປະ​ກອບໃຫ້ເກີດພະຍາດໃນສັດນໍ້າ;
3. ການຕິດເຊື້ອ ໝາຍເຖິງ ການເຂົ້າໄປ ແລະ ກໍ່ຕົວ ຫຼື ການເພີ່ມຈໍານວນຂອງເຊື້ອພະຍາດສັດນໍ້າ ຢູ່ໃນຮ່າງກາຍຂອງຄົນ, ສັດ ແລະ ສັດນໍ້າ;
4. ພະຍາດສັດນໍ້າທີ່ຈຳເປັນຕ້ອງແຈ້ງ ໝາຍເຖິງ ພະຍາດສັດນໍ້າ ທີ່ສາມາດຕິດຕໍ່ຈາກສັດນໍ້າສູ່ສັດນໍ້າຫຼື ຈາກສັດນໍ້າສູ່ຄົນ ຊຶ່ງມີການແຜ່ລາມໄວ, ສ້າງຜົນກະທົບທາງລົບຕໍ່ສຸຂະພາບ, ຊີວິດ,  ເສດຖະກິດ ແລະ ສັງຄົມ;
5. ການ​ກັກ​ກັນສັດນໍ້າ​ ໝາຍເຖິງ ການຂັງສັດນໍ້າໄວ້ ເພື່ອໃຫ້ສັດນໍ້າໄດ້ພັກຜ່ອນ ​ໂດຍ​ມີ​ການໃຫ້ອາຫານປົກກະຕິ ເພື່ອເຝົ້າລະວັງ, ຕິດຕາມ, ກວດກາ, ວິໄຈ ແລະ ຢັ້ງຢືນ, ປິ່ນປົວຮັກສາ ແລະ ຂ້າເຊື້ອພະຍາດ;
6. ການ​ປະ​ເມີນ​ຄວາມ​ສ່ຽງ​ ໝາຍເຖິງ ການປະເມີນເພື່ອຊອກຫາຄວາມເປັນໄປໄດ້ກ່ຽວກັບ ຜົນກະທົບທາງດ້ານຊີວະ, ເສດຖະກິດ ທີ່ເກີດຈາກການນໍາເຂົ້າ ຊຶ່ງອາດເປັນອັນຕະລາຍ ຫຼື ແຜ່ກະຈາຍຢູ່ດິນ ແດນ ຂອງ ສປປ ລາວ;
7. ການຂົນສົ່ງ ໝາຍເຖິງ ວິທີການຂົນສົ່ງສັດນໍ້າ ແລະ ຜະລິດຕະພັນສັດນໍ້າ ໂດຍທາງ​ບົກ​, ທາງນໍ້າ ຫຼື ທາງ​ອາ​ກາດ;
8. ເຈົ້າໜ້າທີ່ສັດຕະວະແພດ ໝາຍເຖິງ ພະນັກງານສັດຕະວະແພດ ຫຼື ຜູ້ທີ່ໄດ້ຮັບການແຕ່ງຕັ້ງ ຊຶ່ງໄດ້ຮັບການຝຶກອົບຮົມ ຍົກລະດັບຄວາມຮູ້, ຄວາມສາມາດ ໃນການກວດກາວຽກງານລ້ຽງສັດ, ສັດຕະວະ ແພດ ແລະ ການປະມົງ;
9. CITES (Convention on International Trade in Endangered Species of Wild Fauna and Flora: CITES) ໝາຍເຖິງ ສົນທິສັນຍາສາກົນ ​ວ່າດ້ວຍການຄ້າຂາຍຊະນິດພັນສັດປ່າ ແລະ ພືດປ່າທີ່ໃກ້​ຈະ​ສູນ​ພັນລະຫວ່າງຊາດ;
10. OIE (Office International des Epizooties: OIE) ໝາຍເຖິງ ອົງການສຸຂະພາບສັດສາກົນ ຊຶ່ງ​ເປັນອົງການຈັດຕັ້ງສາກົນທີ່ຮັບຜິດຊອບວຽກງານ ສຸຂະພາບສັດ ແລະ ສັດນໍ້າ.

ມາດຕາ 4  ຫຼັກການກ່ຽວກັບການນໍາເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ

ການນໍາເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ ຕ້ອງ​ຮັບ​ປະກັນຫຼັກການ ດັ່ງນີ້:

1. ສອດຄ່ອງກັບ ນະໂຍບາຍ, ກົດໝາຍ ແລະ ນິຕິ​ກໍາ ຂອງ ສປປ ລາວ;
2. ຮັບປະກັນ ຄຸນນະພາບ ແລະ ຄວາມປອດໄພ ຕໍ່ສຸຂະພາບສັດນໍ້າ ແລະ ຜູ້ບໍລິໂພກ;
3. ປະຕິບັດ ຢ່າງເປັນເອກະພາບ, ໂປ່ງໃສ, ຍຸຕິທໍາ ແລະ ສາມາດກວດກາໄດ້;
4. ຮັບປະກັນ ບໍ່ສ້າງສິ່ງກີດຂວາງທີ່ບໍ່ຈຳເປັນ ຕໍ່ການຄ້າ ແລະ ບໍ່​ເລືອກປະຕິບັດ​;
5. ສອດຄ່ອງກັບມາດຕະຖານດ້ານເຕັກນິກ ແລະ ຄໍາແນະນໍາຂອງອົງການຈັດຕັ້ງສາກົນທີ່ກ່ຽວຂ້ອງ ລວມທັງ ສົນທິສັນຍາ ແລະ ສັນຍາສາກົນ ທີ່ ສປປ ລາວ ເປັນພາຄີ.

ມາດຕາ 5  ຂອບເຂດການນຳໃຊ້

ຂໍ້ຕົກລົງສະບັບ​ນີ້​ ນຳໃຊ້ສຳລັບ ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່​ກ່ຽວຂ້ອງກັບການນໍາເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ​ແລະ ​ຜະລິດຕະພັນ​ສັດນໍ້າ ໃນ ສປປ ລາວ.​

ໝວດທີ 2
ການນໍາເຂົ້າ ສັດນໍ້າ ແລະ ຜະລິດຕະພັນສັດນໍ້າ

ມາດຕາ 6  ການອະນຸຍາດນໍາເຂົ້າ

ບຸກຄົນ, ນິຕິບຸກຄົນ ​ແລະ ການຈັດຕັ້ງ ທີ່ມີຈຸດປະສົງນໍາເຂົ້າ ສັດນໍ້າ ແລະ ຜະລິດຕະພັນສັດນໍ້າ ທີ່ໄດ້ກໍານົດໄວ້ໃນເອກະສານຊ້ອນທ້າຍ 1 ຂອງຂໍ້ຕົກລົງສະບັບນີ້ ເພື່ອ​ເປົ້າໝາຍທາງ​ການຄ້າ ຕ້ອງໄດ້ຮັບ​ອະນຸຍາດ ຈາກ ກົມ​ລ້ຽງສັດ ​ແລະ ການ​ປະມົງ. ສໍາລັບ ການນຳເຂົ້າເພື່ອບໍລິໂພກພາຍໃນຄອບຄົວ ແມ່ນບໍ່ໄດ້ຂໍໃບ​ອະ​ນຸ​ຍາດ​ນໍາ​ເຂົ້າ ແຕ່ຕ້ອງໄດ້​ແຈ້ງສິນຄ້າຕໍ່ເຈົ້າໜ້າທີ່ສັດຕະວະ​ແພດປະຈໍາດ່ານ ເພື່ອດໍາເນີນການກວດກາ​, ບັນທຶກ ຫຼື ນໍາໃຊ້ມາດຕະການທີ່ຈໍາເປັນ ຕາມທີ່ ກົມລ້ຽງສັດ ແລະ ການປະມົງ ກໍານົດ.

ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ມີຈຸດປະສົງນຳເອົາສັດນໍ້າສາຍພັນຕ່າງແດນເຂົ້າມາລ້ຽງໃນ ສປປ ລາວ ຕ້ອງໄດ້ຮັບອະນຸຍາດ ຈາກກົມລ້ຽງສັດ ແລະ ການປະມົງ  ແລະ ຕ້ອງມີໃບຢັ້ງຢືນການສຶກສາຜົນກະທົບຕໍ່ລະບົບນິເວດວິທະຍາ ແລະ ສິ່ງແວດລ້ອມ ຈາກສະຖາບັນທີ່ເຊື່ອຖືໄດ້, ມີການຢັ້ງຢືນຄວາມປອດໄພດ້ານຊີວະພາບ ແລະ ໄດ້ຜ່ານການປະເມີນຄວາມສ່ຽງຈາກ ອົງການຄຸ້ມຄອງການປະມົງ ຂອງ ສປປ ລາວ.

ມາດຕາ 7  ເງື່ອນໄຂການນຳເຂົ້າ ສັດນໍ້າ ແລະ ຜະລິດຕະພັນສັດນໍ້າ

ບຸກຄົນ, ນິຕິບຸກຄົນ ​ແລະ ການຈັດຕັ້ງ ທີ່ມີຈຸດປະສົງນໍາເຂົ້າ ສັດນໍ້າ ແລະ ຜະລິດຕະພັນສັດນໍ້າ ມາໃນ ສປປ ລາວ ໃຫ້ປະຕິບັດຕາມເງື່ອນໄຂ ດັ່ງນີ້:

1. ມີໃບອະນຸຍາດນໍາເຂົ້າທີ່ອອກໃຫ້ໂດຍ ອົງການຄຸ້ມຄອງການ​ປະ​ມົງ;
2. ມີໃບຢັ້ງຢືນສຸຂະພາບສັດນໍ້າ ຫຼື ໃບຢັ້ງຢືນສຸຂານາໄມຜະລິດຕະພັນສັດນໍ້າ ທີ່ອອກໃຫ້ໂດຍອົງ ການ ຫຼື ເຈົ້າໜ້າທີ່ຂອງລັດ ທີ່ກ່ຽວຂ້ອງຂອງປະເທດຕົ້ນທາງ ໂດຍຖືກຕ້ອງຕາມເງື່ອນໄຂການນໍາເຂົ້າຂອງ ສປປ ລາວ;
3. ໃນ​ກໍລະນີນໍາເຂົ້າ ເພື່ອລ້ຽງເປັນແນວພັນ​ສັດ​ນ້ຳ ຕ້ອງມີໃບຢັ້ງຢືນກໍາມະພັນສັດນໍ້າ ແລະ ໃບຢັ້ງຢືນມາດຕະຖານຟາມລ້ຽງສັດນໍ້າ;
4. ນໍາເຂົ້າສັດນໍ້າ ແລະ ຜະລິດຕະພັນສັດນໍ້າ ຕາມດ່ານທີ່ກໍານົດ  ໂດຍອົງການຄຸ້ມຄອງ​ການ​ປະ​ມົງ.

ໃນກໍລະນີ ໄດ້ຮັບອະນຸຍາດນໍາເຂົ້າແລ້ວ, ແຕ່ຜົນຂອງການວິເຄາະຄວາມສ່ຽງ ໂດຍອົງການຄຸ້ມຄອງວຽກງານການປະມົງ ທີ່ຢັ້ງຢືນວ່າມີຄວາມສ່ຽງທີ່ຈະນໍາເອົາເຊື້ອພະຍາດເຂົ້າມາແຜ່ລາມ ຫຼື ນໍາເອົາທາດເບື່ອເຂົ້າມາແຜ່ກະຈາຍຢູ່ພາຍໃນປະເທດນັ້ນ ແມ່ນບໍ່ອະນຸຍາດໃຫ້ນໍາເຂົ້າ ​ໂດຍ​ໃຫ້ແຈ້ງເຫດຜົນເປັນລາຍລັກອັກສອນ ກ່ຽວກັບການຫ້າມນັ້ນ ໃຫ້ແກ່ຜູ້ນໍາເຂົ້າຊາບ.

ມາດຕາ 8  ການປະກອບເອກະສານສໍາລັບການຂໍອະນຸຍາດນໍາເຂົ້າ

ການ​ປະກອບເອກະສານສໍາລັບການຂໍອະນຸຍາດນໍາເຂົ້າ ມີ ດັ່ງນີ້:

1. ໃບຄໍາຮ້ອງຂໍອະນຸຍາດນໍາເຂົ້າ ຕາມແບບພິມທີ່ກົມລ້ຽງສັດ ແລະ ການປະມົງ ກໍານົດ;
2. ສໍາເນົາ ບັດປະຈໍາຕົວ ຫຼື ສໍາມະໂນຄົວ;               
3. ສໍາເນົາ ໜັງສືເດີນທາງ (ຖ້າເປັນຄົນຕ່າງປະເທດ);                             
4. ໃບມອບສິດ (ຖ້າໃຫ້ຜູ້ອື່ນມາແລ່ນເອກະສານແທນ);
5. ສໍາເນົາໃບທະບຽນວິສາຫະກິດ.

 ເອກະສານເພີ່ມເຕີມອື່ນ ໃນມື້ນໍາສິນຄ້າເຂົ້າຕົວຈິງ ມີດັ່ງນີ້:

1. ໃບຢັ້ງຢືນສຸຂະພາບສັດນໍ້າ ຫຼື ສຸຂານາໄມ ຈາກອົງການຄຸ້ມຄອງວຽກງານສັດຕະວະແພດ ຫຼື ປະ ມົງ ຂອງປະເທດຕົ້ນທາງ;
2. ສໍາເນົາ ໃບຂົນສົ່ງສິນຄ້າ ຫຼື Bill of Lading/Airway Bill ກໍລະນີຂົນສົ່ງທາງທ່າເຮືອ ຫຼື ເຮືອບິນ;
3. ໃບຢັ້ງຢືນ CITES ຂອງປະເທດຕົ້ນທາງ ຫຼື ເອກະສານທີ່ກ່ຽວຂ້ອງກັບປະເທດທີສາມ ຖ້າເປັນປະເພດສັດນໍ້າຫວງຫ້າມ ຫຼື ຄວບຄຸມຂອງສາກົນ;
4. ໃບຢັ້ງຢືນການບໍາບັດ, ຜົນການວິໄຈ ແລະ ການປ້ອງກັນພະຍາດສັດນໍ້າ ຖ້າມີຄວາມຈໍາເປັນ.

ມາດຕາ 9  ການກະກຽມກ່ອນການນໍາເຂົ້າ

ບຸກຄົນ, ນິຕິບຸກຄົນ ​ແລະ ການຈັດຕັ້ງ ທີ່ມີຈຸດປະສົງນໍາເຂົ້າສັດນໍ້າ ແລະ ຜະລິດຕະພັນສັດນໍ້າ ຕ້ອງກະກຽມ ແລະ ດໍາເນີນການຕາມຂັ້ນຕອນ ດັ່ງນີ້:

1. ພົວພັນເອົາຂໍ້ມູນ, ລະບຽບການ ແລະ ຄໍາຮ້ອງຂໍນໍາເຂົ້າສັດນໍ້າ ແລະ ຜະລິດຕະພັນສັດນໍ້າ ຢູ່ຫ້ອງການກະສິກໍາ ແລະ ປ່າໄມ້ຂັ້ນເມືອງ, ພະແນກກະສິກຳ ແລະ ປ່າໄມ້ ຂັ້ນແຂວງ, ດ່ານກວດກາສັດຕະວະ ແພດສາກົນ, ກົມລ້ຽງສັດ ແລະ ການປະມົງ ຫຼື ດາວ​ໂລດ​ເອົາທີ່​ເວ​ບໄຊ www.dlf.maf.gov.la ຫຼື www.laotradeportal.gov.la;
2. ຍື່ນຄໍາຮ້ອງ ຕໍ່ກົມລ້ຽງສັດ ແລະ ການປະມົງ ຢ່າງໜ້ອຍ ສິບຫ້າວັນ ກ່ອນນໍາເຂົ້າ ຕາມແບບພິມທີ່ໄດ້ກໍານົດໄວ້ໃນເອກະສານຊ້ອນທ້າຍ 3 ຂອງຂໍ້ຕົກລົງສະບັບນີ້ ​ເພື່ອ​ໃຫ້ ກົມລ້ຽງສັດ ແລະ ການປະມົງ ປະເມີນຄວາມສ່ຽງ ແລະ ພິຈາລະນາ ອອກໃບອະນຸຍາດ ຕາມແບບພິມ ທີ່ໄດ້ກໍານົດໄວ້ໃນເອກະສານຊ້ອນທ້າຍ 4 ຂອງຂໍ້ຕົກລົງສະບັບນີ້ ພາຍໃນ ຫ້າວັນລັດຖະການ. ສໍາ​ລັບອາຍຸຂອງໃບອະນຸຍາດນໍາເຂົ້າ ແມ່ນໃຫ້ອີງໃສ່ລະດັບຂອງຄວາມສ່ຽງ ຕາມແຕ່ລະປະເພດ, ຊະນິດ ແລະ ຈໍານວນຂອງສິນຄ້າ ແຕ່ສູງສຸດບໍ່ໃຫ້ເກີນເກົ້າສິບວັນ;
3. ສົ່ງໃບອະນຸຍາດນໍາເຂົ້າ ແລະ ເງື່ອນໄຂ ເຖິງຜູ້ສົ່ງອອກ ເພື່ອກະກຽມສິນຄ້າ ແລະ ຂໍອະນຸຍາດຈາກອົງການຄຸ້ມຄອງປະມົງຂອງປະເທດຕົ້ນທາງ ໃຫ້ສອດຄ່ອງກັບເງື່ອນໄຂຂອງ ສປປ ລາວ;
4. ແຈ້ງເອກະສານ, ວັນ, ເວລາ ທີ່ແນ່ນອນສຳລັບການນໍາເຂົ້າ ຕໍ່ດ່ານກວດກາສັດຕະວະແພດສາກົນ ບ່ອນທີ່ຈະນໍາເຂົ້າ ຢ່າງໜ້ອຍ ໜຶ່ງວັນ ກ່ອນມື້ນໍາເຂົ້າ ເພື່ອກວດກາ ແລະ ຢັ້ງຢືນຄວາມຖືກຕ້ອງຂອງເອກະສານ ໂດຍການອອກໃບຢັ້ງຢືນການກວດກາເອກະສານຢູ່ດ່ານ. ຖ້າເອກະສານບໍ່ຖືກຕ້ອງ ຫຼື ບໍ່ຄົບຖ້ວນໃຫ້ຜູ້ຂໍອະນຸຍາດນໍາໄປປະກອບໃຫ້ຖືກຕ້ອງ.

ມາດຕາ 10 ການປະຕິບັດຢູ່ດ່ານໃນເວລານໍາເຂົ້າ

ໃນເວລານໍາເຂົ້າສັດນໍ້າ ແລະ ຜະລິດຕະພັນສັດນໍ້າຢູ່ດ່ານ ໃຫ້ປະຕິບັດ ດັ່ງນີ້:

1. ຜູ້ນໍາເຂົ້າ ແຈ້ງໃບຢັ້ງຢືນການກວດກາເອກະສານຢູ່ດ່ານ, ລາຍການສັດນໍ້າ ແລະ ຜະລິດຕະພັນສັດນໍ້າ ຕໍ່ເຈົ້າໜ້າທີ່ສັັດຕະວະແພດປະຈໍາດ່ານ;
2. ເຈົ້າໜ້າທີ່ສັັດຕະວະແພດປະຈໍາດ່ານ ບັນທຶກຂໍ້ມູນກ່ຽວກັບສັັດນໍ້າ ແລະ ຜະລິດຕະພັນສັດນໍ້າ ເຂົ້າໃນຖານຂໍ້ມູນ ​ແລ້ວດໍາເນີນການກວດກາ ແລະ ອອກໃບຢັ້ງຢືນການກວດກາຢູ່ດ່ານ ຕາມແບບພິມທີ່ກຳ ນົດໄວ້ໃນເອກະສານຊ້ອນທ້າຍ 6 ຂອງຂໍ້ຕົກລົງສະບັບນີ້ ພ້ອມ​ທັງສໍາເນົາໄວ້ ໜຶ່ງສະບັບ ແລະ ແຈ້ງໃຫ້ຜູ້ນໍາເຂົ້າຈ່າຍຄ່າທໍານຽມ ແລະ ບໍລິການຕາມລະບຽບການ ແລ້ວຈຶ່ງອະນຸຍາດໃຫ້ເຄື່ອນຍ້າຍສິນຄ້າໄປຫາພາກ ສ່ວນພາສີ ຫຼື ພາກສ່ວນອື່ນທີ່ກ່ຽວຂ້ອງ. ໃນກໍລະນີພົບເອກະສານມີການດັດແກ້ເນື້ອໃນ, ປອມລາຍເຊັນ ຫຼື ຕາປະທັບ ເຈົ້າໜ້າທີ່ສັດຕະວະແພດປະຈໍາດ່ານ ຕ້ອງປະຕິເສດການນໍາເຂົ້າ ພ້ອມທັງກັກສິນຄ້ານັ້ນໄວ້ ເພື່ອດໍາເນີນການກວດກາ, ສືບສວນ-ສອບສວນ ແລະ ລາຍງານໃຫ້ ກົມລ້ຽງສັດ ແລະ ການປະມົງ ແລະ ພະແນກກະສິກໍາ ແລະ ປ່າໄມ້ ຂັ້ນແຂວງ ຮັບຊາບໂດຍດ່ວນ;
3. ໃນກໍລະນີສົງໄສ ສັດນໍ້າ ຫຼື ຜະລິດຕະພັນສັດນໍ້າ ຕິດ ຫຼື ປົນເປື້ອນດ້ວຍພະຍາດສັດນໍ້າທີ່ຈໍາເປັນຕ້ອງແຈ້ງ ຕາມທີ່ກໍານົດໄວ້ໃນເອກະສານຊ້ອນທ້າຍ 2 ໃຫ້ເຈົ້າໜ້າທີ່ສັດຕະວະແພດປະຈຳດ່ານ ແຈ້ງຜູ້ ນໍາເຂົ້າ ນໍາສິນຄ້າໄປກັກກັນຢູ່ສະຖານທີ່ກັກກັນ, ແນະນໍາແຜນການຕິດຕາມ, ກັກກັນ ແລະ ມາດຕະການດ້ານວິຊາການທີ່ນໍາໃຊ້ ໃຫ້ແກ່ຜູ້ນໍາເຂົ້າຊາບ ພ້ອມທັງປະຕິບັດມາດຕະການໃດໜຶ່ງ ໂດຍດ່ວນ ດັັ່ງນີ້:
   • ເກັບ ແລະ ສົ່ງຕົວຢ່າງຂອງສັດນໍ້າ ແລະ ຜະລິດຕະພັນສັດນໍ້ານັ້ນ ໄປວິໄຈ;
   • ດຳເນີນການອະນາໄມ ຂ້າເຊື້ອພາຫະນະ ແລະ ອຸປະກອນສໍາລັບການຂົນສົ່ງ;
   • ພາຍຫຼັງສຳເລັດການ​ວິ​ໄຈ ຕ້ອງແຈ້ງຜົນການວິໄຈ ໃຫ້ຜູ້ນຳເຂົ້າຊາບ.
4. ກໍລະນີ ພົບພະຍາດສັດນໍ້າທີ່ຈໍາເປັນຕ້ອງແຈ້ງ, ຢາ ຫຼື ສານຕົກຄ້າງທີ່ເປັນອັນຕະລາຍ, ເຈົ້າໜ້າທີ່ສັດຕະວະແພດປະຈຳດ່ານ ຕ້ອງນໍາໃຊ້ມາດຕະການໃດໜຶ່ງ ດັ່ງນີ້:

• ກັກ ຫຼື ກັກກັນສັດນໍ້າ ຫຼື ຜະລິດຕະພັນສັດນໍ້າ;
• ສົ່ງສິນຄ້າກັບຄືນປະເທດສົ່ງອອກ;
• ບໍາບັດ, ອະນາໄມ ແລະ ຂ້າເຊື້ອພະຍາດທີ່ຕິດ ຫຼື ປົນເປື້ອນມານໍາສິນຄ້າ ແລະ ວັດຖູປະກອນ ທີ່ກ່ຽວຂ້ອງ;
• ທໍາລາຍສິນຄ້າດັ່ງກ່າວຕາມຫຼັກວິຊາການ;
• ລາຍງານໃຫ້ ພະແນກກະສິກຳ ແລະ ປ່າໄມ້ ຂັ້ນແຂວງ ​ແລະ ກົມລ້ຽງສັດ ແລະ ການປະມົງ ຮັບຊາບ ເພື່ອແຈ້ງຂໍ້ມູນໄປຍັງອົງການສຸຂະພາບສັດສາກົນ, ອົງການຈັດຕັ້ງທີ່ກ່ຽວຂ້ອງ ແລະ ປະເທດທີ່ສົ່ງອອກຊາບ ພາຍໃນ ຊາວສີ່ຊົ່ວໂມງ.

ມາດຕາ 11 ການໃຫ້ ສັດນໍ້າ ແລະ ຜະລິດຕະພັນສັດນໍ້າຜ່ານດ່ານ

ພາຍຫຼັງ ເຈົ້າໜ້າທີ່ສັດຕະວະແພດປະຈໍາດ່ານ ດຳເນີນການກວດກາເອກະສານທີ່ກ່ຽວຂ້ອງກັບສິນຄ້າ   ແລະ ອອກໃບຢັ້ງຢືນການກວດກາແລ້ວ, ເຈົ້າໜ້າທີ່ສັັດຕະວະແພດປະຈໍາດ່ານ ຕ້ອງປ່ອຍສິນຄ້າຜ່ານດ່ານ ພ້ອມທັງ ແນະນຳໃຫ້ຜູ້ນຳເຂົ້າໄປແຈ້ງເອກະສານຕໍ່ເຈົ້າໜ້າທີ່ພາສີ ຫຼື ​ເຈົ້າໜ້າທີ່​ອື່ນ​ທີ່​ກ່ຽວຂ້ອງ ເພື່ອດໍາເນີນຕາມລະບຽບການ.

ກໍລະນີ ມີຄວາມຈຳເປັນຕ້ອງໄດ້ກວດກາພາຍຫຼັງການນຳເຂົ້າ ເຈົ້າໜ້າທີ່ສັດຕະວະແພດປະຈໍາດ່ານ ຕ້ອງແຈ້ງໃຫ້ຜູ້ນໍາເຂົ້າ ເຄື່ອນຍ້າຍສັດນໍ້າ ແລະ ຜະລິດຕະພັນສັດນໍ້າ ໄປຫາສະຖານທີ່ກັກກັນ ຫຼື ສະຖານທີ່ອື່ນ ທີ່ອົງການຄຸ້ມຄອງ​ການປະມົງ ຮັບຮອງ ເພື່ອດໍາເນີນການຕິດຕາມກວດກາ ຕາມໄລຍະເວລາທີ່ກໍານົດ.

ມາດຕາ 12 ການໂຈະ ຫຼື ຍົກເລີກ ໃບອະນຸຍາດນໍາເຂົ້າ

ດ່ານກວດກາສັດຕະວະແພດ ສະເໜີກົົມລ້ຽງສັດ ແລະ ການປະມົງ ເພື່ອພິຈາລະນາ ໂຈະ ຫຼື ຍົກເລີກ ໃບອະນຸຍາດນໍາເຂົ້າ ຖ້າເຫັນວ່າມີການລະເມີດ ກໍລະນີໃດໜຶ່ງ ດັ່ງນີ້:

1. ກວດພົບ ປະເພດ ຫຼື ປະລິມານສິນຄ້າ ບໍ່ຖືກຕ້ອງກັບຂໍ້ມູນທີ່ໄດ້ກຳນົດໄວ້ ໃນໃບອະນຸຍາດ;
2. ນໍາສິນຄ້າເຂົ້າດ່ານ ບໍ່ຖືກຕາມການກຳນົດໄວ້ໃນໃບອະນຸຍາດນຳເຂົ້າ;
3. ນໍາໃຊ້ໃບອະນຸຍາດນຳເຂົ້າທີ່ໝົດອາຍຸການນຳໃຊ້;
4. ສົງໄສ ມີ ຫຼື ປົນເປື້ອນເຊື້ອພະຍາດ ທີ່ກໍານົດຢູ່ໃນບັນຊີລາຍຊື່ພະຍາດສັດນໍ້າທີ່ຈໍາເປັນຕ້ອງແຈ້ງ;
5. ກວດພົບພະຍາດສັດນໍ້າຕ່າງແດນຊະນິດໃໝ່ ຫຼື ພະຍາດສັດນໍ້າທີ່ບໍ່ຮູ້ຈັກ ຫຼື ພະຍາດທີ່ນອນຢູ່ໃນບັນຊີພະຍາດສັດນໍ້າທີ່ຈໍາເປັນຕ້ອງແຈ້ງ;
6. ມີການຢັ້ງຢືນວ່າສິນຄ້ານໍາເຂົ້າ ມີການປົນເປື້ອນດ້ວຍຢາ, ສານກະຕຸ້ນ ຫຼື ສານເຄມີທີ່ເປັນອັນຕະ ລາຍເກີນລະດັບຄວາມປອດໄພ ຕໍ່ສຸຂະພາບ ຂອງຄົນ, ສັດ ແລະ ສິ່ງແວດລ້ອມ;
7. ມີການລາຍງານ ພະຍາດສັດນໍ້າລະບາດຢູ່ປະເທດສົ່ງອອກ.

ມາດຕາ 13ການຕິດຕາມກວດກາພາຍຫຼັງການນໍາເຂົ້າ

ການຕິດຕາມກວດກາພາຍຫຼັງການນໍາເຂົ້າ ໃຫ້ດໍາເນີນໄດ້ ໃນກໍລະນີທີ່ມີຄວາມຈໍາເປັນ ດັ່ງນີ້:

1. ມີການກັກກັນສັດນໍ້າ ທີ່ພົບອາການສົງໄສເກີດພະຍາດສັດນໍ້າ ຫຼື ມີການສົງໄສພົບສິ່ງທີ່ເປັນອັນຕະລາຍໃນຜະລິດຕະພັນສັດນໍ້າ ຊຶ່ງຕ້ອງໄດ້ຕິດຕາມກວດກາ ແລະ ເກັບຕົວຢ່າງນໍາໄປວິໄຈເພີ່ມ;
2. ສັດນໍ້າໄດ້ຮັບບາດເຈັບ ຫຼື ມີອາການຜິດປົກກະຕິ ຈາກການຂົນສົ່ງ ຊຶ່ງຕ້ອງໄດ້ຕິດຕາມ, ບໍາບັດ ແລະ ປິ່ນປົວເປັນການສະເພາະ;
3. ສັດນ້ຳ ຕ້ອງໄດ້ກັກກັນຢູ່ສະຖານທີ່ໃດໜຶ່ງ ທີ່ອົງການຄຸ້ມຄອງການປະມົງ ຮັບຮອງ ກ່ອນນໍາເຂົ້າລ້ຽງໃນຟາມ.

ໃນລະຫວ່າງການຕິດຕາມ ກວດກາ ຢູ່ສະຖານທີ່ກັກກັນ ຫາກບໍ່ພົບພະຍາດສັດນໍ້າທີ່ຈໍາເປັນຕ້ອງແຈ້ງ ຫຼື ບໍ່ພົບສິ່ງທີ່ເປັນອັນຕະລາຍ, ເຈົ້າໜ້າທີ່ສັດຕະວະແພດປະຈໍາດ່ານ ຕ້ອງອອກໃບຢັ້ງຢືນການກັກກັນສັດນໍ້າ ພ້ອມທັງອະນຸຍາດປ່ອຍສິນຄ້າອອກຈາກສະຖານທີ່ກັກກັນ. ກໍລະນີພົບເຊື້ອພະຍາດສັດນໍ້າທີ່ຈໍາເປັນຕ້ອງແຈ້ງ ຫຼື ສິ່ງເປັນອັນຕະລາຍ ເຈົ້າໜ້າທີ່ສັດ​ຕະ​ວະ​ແພດ ຕ້ອງລາຍງານໃຫ້ອົງການຄຸ້ມຄອງການປະມົງ ຊາບໂດຍດ່ວນ ​ເພື່ອດໍາເນີນມາດຕະການຄວບຄຸມໃຫ້ທັນການ.

ໝວດທີ 3
ການສົ່ງອອກ ສັດນໍ້າ ແລະ ຜະລິດຕະພັນສັດນໍ້າ

ມາດຕາ 14 ການກະກຽມກ່ອນການສົ່ງອອກ

ບຸກຄົນ, ນິຕິບຸກຄົນ ​ແລະ ການຈັດຕັ້ງ ທີ່ມີຈຸດປະສົງ ສົ່ງອອກສັດນໍ້າ ແລະ ​ຜະລິດຕະພັນສັດນໍ້າ ຕ້ອງກະກຽມ ແລະ ປະຕິບັດຕາມຂັ້ນຕອນ ດັ່ງນີ້:

1. ພົວພັນເອົາ ຂໍ້ມູນ, ລະບຽບການ ແລະ ຄຳຮ້ອງຂໍນຳເຂົ້ົ້າສັດນໍ້າ ແລະ ຜະລິດຕະພັນສັດນໍ້າ ຂອງປະເທດທີ່ຈະນຳເຂົ້າ;
2. ຂໍອະນຸຍາດນໍາເຂົ້າຕາມລະບຽບການທີ່ອົງການຄຸ້ມຄອງຂອງປະເທດນໍາເຂົ້າກໍານົດ;
3. ແຈ້ງໃບອະນຸຍາດ ແລະ ເງື່ອນໄຂການນໍາເຂົ້າ ຂອງປະເທດທີ່ຈະນໍາເຂົ້າ ໃຫ້ກົມລ້ຽງສັດ ແລະ ການປະມົງ ຊາບ;
4. ຍື່ນຄໍາຮ້ອງ ພ້ອມດ້ວຍເອກະສານຂໍອະນຸຍາດສົ່ງອອກ ຕໍ່ ກົມລ້ຽງສັດ ແລະ ການປະມົງ ຢ່າງຊ້າ ສິບຫ້າວັນ ກ່ອນການສົ່ງອອກ ຕາມແບບພິມທີ່ໄດ້ກຳນົດໄວ້ໃນເອກະສານຊ້ອນທ້າຍ 3 ຂອງຂໍ້ຕົກລົງສະບັບນີ້ ​ເພື່ອດໍາເນີນການກວດກາ ແລະ ອອກໃບຢັ້ງຢືນສຸຂະພາບສັດນໍ້າ ຫຼື ສຸຂານາໄມ ຕາມແບບພິມທີ່ກໍານົດໄວ້ໃນເອກະສານຊ້ອນທ້າຍ 5 ຂອງຂໍ້ຕົກລົງສະບັບນີ້ ແລະ ໃບອະນຸຍາດສົ່ງອອກໃຫ້ແກ່ຜູ້ຂໍສົ່ງອອກ. 

ມາດຕາ 15 ການປະຕິບັດຢູ່ດ່ານໃນເວລາສົ່ງອອກ

ໃນເວລາສົ່ງອອກ ສັດນໍ້າ ແລະ ຜະລິດຕະພັນສັດນໍ້າ ຢູ່ດ່ານ ໃຫ້ປະຕິບັດ ດັ່ງນີ້:

1. ຜູ້ສົ່ງອອກ ຕ້ອງແຈ້ງເອກະສານ ແລະ ບອກວັນ, ເວລາ ທີ່ແນ່ນອນສຳລັບການສົ່ງອອກ  ຕໍ່ດ່ານກວດກາສັດຕະວະແພດສາກົນບ່ອນທີ່ຈະສົ່ງອອກ ຢ່າງໜ້ອຍ ໜຶ່ງວັນ ກ່ອນການ​ສົ່ງອອກ ເພື່ອກວດກາ ແລະ ຢັ້ງຢືນຄວາມຖືກຕ້ອງຂອງເອກະສານ. ຖ້າເອກະສານບໍ່ຖືກຕ້ອງ ຫຼື ບໍ່ຄົບຖ້ວນ ເຈົ້າໜ້າທີ່ສັດ​ຕະ​ວະ​ແພດປະຈໍາດ່ານ ຕ້ອງແນະນໍາໃຫ້ຜູ້ຂໍອະນຸຍາດນໍາໄປປະກອບໃຫ້ຖືກຕ້ອງ;
2. ໃນມື້ສົ່ງອອກ ຜູ້ສົ່ງອອກ ຕ້ອງແຈ້ງໃບຢັ້ງຢືນການກວດກາເອກະສານ ແລະ ລາຍການສັດນໍ້າ ແລະ ຜະລິດຕະພັນສັດນໍ້າ ຕໍ່ເຈົ້າໜ້າສັດຕະວະແພດປະຈໍາດ່ານເພື່ອບັນທຶກເຂົ້າໃນຖານຂໍ້ມູນ;
3. ເຈົ້າໜ້າທີ່ສັດຕະວະແພດປະຈໍາດ່ານ ກວດກາເອກະສານ ແລະ ສິນຄ້າຕົວຈິງ  ແລະ ອອກໃບຢັ້ງຢືນການກວດກາຢູ່ດ່ານ ພ້ອມທັງແຈ້ງໃຫ້ຜູ້ສົ່ງອອກ ຈ່າຍຄ່າທໍານຽມ ແລະ ຄ່າບໍລິການຕາມລະບຽບການ ຈຶ່ງອະນຸຍາດໃຫ້ເຄື່ອນຍ້າຍສິນຄ້າໄປຫາພາກສ່ວນພາສີ ຫຼື ພາກສ່ວນອື່ນທີ່ກ່ຽວຂ້ອງ.

ມາດຕາ 16 ການ​ປະ​ຕິເສດການສົ່ງອອກ

ກົມລ້ຽງສັດ ແລະ ການປະມົງ ສາມາດປະຕິເສດ ພ້ອມທັງແຈ້ງໃຫ້ເຈົ້າຂອງສິນຄ້າຊາບໃນກໍລະນີ ເອ ກະສານມີການດັດແກ້ເນື້ອໃນ, ປອມລາຍເຊັນ ຫຼື ຕາປະທັບຂອງເຈົ້າໜ້າທີ່ສັດຕະວະແພດ, ມີລາຍງານ ການພົບເຊື້ອ​ພະ​ຍາດສັດນໍ້າທີ່ຈໍາເປັນຕ້ອງແຈ້ງ ຫຼື ພະຍາດສັດນໍ້າອື່ນ ຫຼື ສິ່ງທີ່ເປັນອັນຕະລາຍ ທີ່ປະເທດນໍາເຂົ້າຫ້າມນໍາເຂົ້າຢູ່ສະຖານທີ່ ທີ່ເປັນແຫຼ່ງກໍາເນີດສິນຄ້າ.​

ໝວດທີ 4
ການສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ

ມາດຕາ 17 ການຂໍອະນຸຍາດສົ່ງຜ່ານ​

ບຸກຄົນ, ນິຕິບຸກຄົນ ​ແລະ ການຈັດຕັ້ງ ທີ່ມີຈຸດປະສົງ ສົ່ງ​ສັດນໍ້າ ແລະ ຜະລິດຕະພັນສັດນໍ້າ ຜ່ານ ສປປ ລາວ​​ ຕ້ອງປະກອບ​ເອກະສານ​ ​ແລະ ຍື່ນຄໍາຮ້ອງຂໍອະນຸຍາດສົ່ງຜ່ານຕໍ່ ກົມລ້ຽງສັດ ແລະ ການປະມົງ ຕາມ​ແບບພິມທີ່ໄດ້ກຳນົດໄວ້ໃນເອກະສານຊ້ອນທ້າຍ 3 ຂອງຂໍ້ຕົກລົງສະບັບນີ້ ຢ່າງໜ້ອຍ​ ສິບຫ້າວັນ ກ່ອນສິນຄ້າມາເຖິງດ່ານຂາເຂົ້າ.

ມາດຕາ 18 ເອກະສານປະກອບສໍາລັບການຂໍໃບອະນຸຍາດສົ່ງຜ່ານ​

ເອກະສານປະກອບສໍາລັບການຂໍໃບອະນຸຍາດສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ ມີ ດັ່ງນີ້:

1. ສໍາເນົາ ບັດປະຈໍາຕົວ ຫຼື ສໍາມະໂນຄົວ;
2. ສໍາເນົາ ໜັງສືເດີນທາງ (ຖ້າເປັນຄົນຕ່າງປະເທດ);                             
3. ໃບມອບສິດ (ຖ້າໃຫ້ຜູ້ອື່ນມາແລ່ນເອກະສານແທນ);
4. ສໍາເນົາ ໃບທະບຽນວິສາຫະກິດ.

ເອກະສານເພີ່ມເຕີມອື່ນ ໃນມື້ນໍາສິນຄ້າເຂົ້າຕົວຈິງ ມີ ດັ່ງນີ້:

1. ໃບຢັ້ງຢືນສຸຂະພາບສັດນໍ້າ ຫຼື ສຸຂານາໄມຈາກອົງການຄຸ້ມຄອງວຽກງານສັດຕະວະແພດ ຫຼື ອົງ​ການ​ຄຸ້ມ​ຄອງ​ການ​ປະ​ມົງ ຂອງປະເທດຕົ້ນທາງ;
2. ໃບຢັ້ງຢືນ CITES ຂອງປະເທດຕົ້ນທາງ ຫຼື ເອກະສານທີ່ກ່ຽວຂ້ອງກັບປະເທດທີສາມ ຖ້າເປັນປະເພດສັດນໍ້າຫວງຫ້າມ ຫຼື ຄວບຄຸມຂອງສາກົນ;
3. ເອກະສານແຈ້ງ ກ່ຽວກັບການບໍາບັດ ຖ້າຈໍາເປັນ;
4. ສໍາເນົາ ໃບຂົນສົ່ງສິນຄ້າ ຫຼື Bill of Lading/Airway Bill ກໍລະນີຂົນສົ່ງທາງທ່າເຮືອ ຫຼື ເຮືອບິນ;
5. ເອກະສານຫຼັກຖານອື່ນ ເປັນຕົ້ນ ໃບອະນຸຍາດຂອງການນໍາເຂົ້າຂອງປະເທດປາຍທາງ ຫຼື ສັນຍາລະຫວ່າງຄູ່ຄ້າ ຂອງປະເທດຕົ້ນທາງ ແລະ ປະເທດປາຍທາງ.

ມາດຕາ 19ການປະຕິບັດຢູ່ດ່ານໃນເວລານໍາເຂົ້າເພື່ອສົ່ງຜ່ານ

ກ່ອນສິນຄ້າມາເຖິງດ່ານຂາເຂົ້າຢ່າງໜ້ອຍໜຶ່ງວັນ ຜູ້ຂົນສົ່ງສິນຄ້າ ຕ້ອງແຈ້ງເອກະສານກ່ຽວກັບສິນຄ້າ ຕໍ່ເຈົ້າໜ້າທີ່ສັດຕະວະແພດປະຈໍາດ່ານ ທີ່ກ່ຽວຂ້ອງ.

ສຳ​ລັບຂັ້ນຕອນການກວດກາ ແລະ ຢັ້ງຢືນ ສໍາລັບດ່ານຂາເຂົ້າ ໃຫ້ປະຕິບັດຕາມຂັ້ນຕອນການປະຕິ ບັດຢູ່ດ່ານໃນເວລານໍາເຂົ້າ ຕາມທີ່ໄດ້ກໍານົດໄວ້ໃນມາດຕາ 10 ຂອງຂໍ້ຕົກລົງສະບັບນີ້.

ສໍາລັບຂັ້ນຕອນ ຢູ່ດ່ານຂາອອກ ໃຫ້ປະຕິບັດ ຕາມມາດຕາ 15 ຂອງຂໍ້ຕົກລົງສະບັບນີ້.

ມາດຕາ 20ມາດ​ຕະ​ການຄວບຄຸມການ​​ສົ່ງຜ່ານ​

​ການສົ່ງຜ່ານສັດນໍ້າ ແລະ ຜະລິດຕະພັນສັດນໍ້າ ຕ້ອງປະຕິບັດຕາມມາດຕະການ ດັ່ງນີ້:

1. ໄປຕາມເສັ້ນ​ທາງທີ່ກໍານົດໄວ້ໃນໃບອະນຸຍາດ​​, ໃນກໍລະນີທີ່ມີຄວາມຈໍາເປັນຕ້ອງໄດ້ນໍາສິນຄ້າຂົນສົ່ງໄປເສັ້ນທາງອື່ນ ຍ້ອນເກີດເຫດການສຸກເສີນໃດໜຶ່ງ ຜູ້​ຂົນ​ສົ່ງຜ່ານ ຕ້ອງແຈ້ງໃຫ້​ພະແນກກະສິກໍາ ແລະ ປ່າໄມ້ຂັ້ນແຂວງ ຫຼື ຫ້ອງການກະສິກຳ ແລະ ປ່າໄມ້ຂັ້ນເມືອງ ບ່ອນທີ່ເກີດເຫດສຸກເສີນ ​ເພື່ອແກ້ໄຂຊ່ວຍໃຫ້ທັນການ​ ພ້ອມທັງແຈ້ງໃຫ້ເຈົ້າໜ້າທີ່ສັດຕະວະແພດປະຈໍາດ່ານຂາເຂົ້າ ແລະ ອອກ ຮັບຊາບ;
2. ດຳເນີນການບໍາບັດ​ສິນ​ຄ້າທີ່ຂົນ​ສົ່ງ​ຜ່ານ ​ໃນກໍລະນີທີ່ພົບການສົງໄສ;
3. ມີລະບົບການຕິດ​ຕາມ ​ໃນ​ເວລາຂົນ​ສົ່ງ;
4. ຮັບປະກັນການບັນຈຸ ​ເຊັ່ນ: ພາຫະນະ, ຕູ້ແຊ່ເຢັນ​, ພາຊະນະ​ບັນຈຸ ແລະ ການຫຸ້ມ​ຫໍ່ ​ຕ້ອງບໍ່​ໃຫ້​​ຮົ່ວ​ໄຫຼ​;
5. ຂົນສົ່ງຜ່ານ ຕາມໄລຍະ​ເວ​ລາທີ່ກໍານົດ​;
6. ດໍາເນີນການກໍາ​ຈັດນໍ້າ ແລະ ​ສິ່ງ​ເສດ​ເຫຼືອ ຢ່າງມີປະສິດທິພາບ;
7. ໃນ​ກໍ​ລະ​ນີສຸກ​ເສີນ ທີ່ມີການຄ່ຽນຖ່າຍສິນຄ້າຕ້ອງມີການກວດກາຕິດຕາມ ໂດຍເຈົ້າໜ້າທີ່ ທີ່ໄດ້ຮັບມອບໝາຍ;
8. ມີລະບົບຮອງຮັບ ເພື່ອ​ກັນ ແລະ ຄວບຄຸມພະຍາດສັດນໍ້າ ທີ່ຈໍາເປັນຕ້ອງແຈ້ງ;
9. ປະກອບເອກະສານ ໃຫ້ຖືກຕ້ອງ ແລະ ຄົບຖ້ວນ ຕາມທີ່ປະເທດປາຍທາງຮຽກຮ້ອງ.

ມາດຕາ 21 ການ​ປະ​ຕິເສດການສົ່ງຜ່ານ

ດ່ານກວດກາສັດຕະວະແພດ ສາມາດສະເໜີ ກົມລ້ຽງສັດ ແລະ ການປະມົງ ເພື່ອພິຈາລະນາ ໂຈະ ຫຼື ຍົກເລີກໃບອະນຸຍາດສົ່ງຜ່ານ ຖ້າພົບ ກໍລະນີໃດໜຶ່ງ ດັ່ງນີ້:

1. ປະເພດ ຫຼື ປະລິມານສິນຄ້າ ບໍ່ຖືກຕ້ອງກັບຂໍ້ມູນທີ່ໄດ້ກຳນົດໄວ້ ໃນໃບອະນຸຍາດສົ່ງຜ່ານ;
2. ນໍາສິນຄ້າເຂົ້າດ່ານ ທີ່ບໍ່ຖືກຕາມການກຳນົດໃນໃບອະນຸຍາດນຳເຂົ້າ;
3. ນໍາໃຊ້ໃບອະນຸຍາດສົ່ງຜ່ານທີ່ໝົດອາຍຸການນຳໃຊ້;
4. ສົງໄສ ມີ ຫຼື ປົນເປື້ອນເຊື້ອພະຍາດ ທີ່ກໍານົດໃນບັນຊີລາຍຊື່ພະຍາດສັດນໍ້າທີ່ຈໍາເປັນຕ້ອງແຈ້ງ;
5. ມີການລາຍງານພະຍາດສັດນໍ້າ ລະບາດຢູ່ປະເທດສົ່ງອອກ.

ຫາກເກີດກໍລະນີຕ້ອງໄດ້ປະຕິເສດ, ສົ່ງກັບ ຫຼື ມີການທຳລາຍ ກົມລ້ຽງສັດ ແລະ ການປະມົງ ຕ້ອງແຈ້ງໃຫ້ອົງການທີ່ກ່ຽວຂ້ອງ ຂອງປະເທດຕົ້ນທາງ​ຊາບ ພາຍໃນ ຊາວສີ່ຊົ່ວໂມງ.

ໝວດທີ 5
ການເຄື່ອນຍ້າຍ ສັດນໍ້າ ແລະ ຜະລິດຕະພັນສັດນໍ້າ

ມາດຕາ 22ພາຫະນະ​ຂົນສົ່ງສັດນໍ້າ ແລະ ຜະລິດຕະພັນສັດນໍ້າ

ພາຫະນະທີ່ນໍາ​ໃຊ້​ເຂົ້າ​ໃນ​ການ​ຂົນສົ່ງສັດນໍ້າ ແລະ ຜະລິດຕະພັນສັດນໍ້າ ຕ້ອງອອກແບບໃຫ້ສາມາດທົນຕໍ່ການຮັບ​ນໍ້າໜັກ​ຂອງສິນຄ້າທີ່​ຈະບັນຈຸ​, ສາມາດ​ກວດກາສ່ວນປະກອບພາຍໃນໄດ້ຢ່າງສະດວກ, ຮັບປະ ກັນບໍ່ໃຫ້ຮົ່ວຊຶມ ແລະ ​ກະຈາຍ​ນໍ້າເສດເຫຼືອອອກສູ່ພາຍນອກ.

ມາດຕາ 23ນໍ້າໃຊ້ສໍາລັບການຂົນສົ່ງສັດນໍ້າ

​ນໍ້າທີ່ໃຊ້ສໍາລັບການຂົນສົ່ງສັດນໍ້າ ຕ້ອງມີຄຸນນະພາບເໝາະສົມກັບສັດນໍ້າແຕ່ລະຊະນິດ. 

ນໍ້າທີ່ເຫຼືອຫຼັງຈາກການຂົນສົ່ງສັດນໍ້າ ກ່ອນປ່ອຍລົງສູ່ທຳມະຊາດ ຫຼື ສະຖານທີ່ອື່ນຕ້ອງບໍາບັດຕາມວິທີການ ທີ່ກົມລ້ຽງສັດ ແລະ ການປະມົງ ກໍານົດ.

ມາດຕາ 24ການອະນາໄມ ແລະ ຂ້າເຊື້ອ

​ພາຫະນະ, ຖັງ ຫຼື ອຸປະກອນທີ່ໃຊ້ສຳລັບການຂົນສົ່ງສັດນໍ້າ ຕ້ອງທຳຄວາມສະອາດ, ອະນາໄມ ແລະ ​ຂ້າເຊື້ອ​ຖັງ ກ່ອນ ແລະ ຫຼັງການຂົນສົ່ງທຸກຄັ້ງ.

ຢາ ຫຼື ສານເຄມີທີ່​ໃຊ້​ເຂົ້າ​ໃນ​ການຂ້າເຊື້ອພະຍາດ​ສັດ​ນໍ້າ ຕ້ອງນໍາໃຊ້ຊະນິດທີ່ເໝາະສົມ ​ແລະ ປອດໄພຕໍ່ພາຫະນະ, ຜູ້ນໍາໃຊ້ ທັງ​ສອດຄ່ອງ​ກັບຄຳ​ແນະນຳຂອງຜູ້ຜະລິດ.

​

ມາດຕາ 25ການຂົນສົ່ງ ປາ ແລະ ສັດນໍ້າ ທີ່ມີຊີວິດ

ການຂົນສົ່ງ ປາ ແລະ ສັດນໍ້າທີ່ມີຊີວິດ ຄວນບັນຈຸໃສ່ຄອນເທນເນີ, ຖັງ ຫຼື ຖົງ ທີ່​ມີນໍ້າສະອາດ, ມີປະລິມານອົກຊີແຊນທີ່ພຽງພໍ ແລະ ອັດຕາການປ່ອຍທີ່ເໝາະສົມ ຕາມຄໍາແນະນໍາຂອງ ກົມລ້ຽງສັດ ແລະ ການປະມົງ.

​ໃນກໍລະນີ ຂົນສົ່ງປາ ແລະ ສັດນໍ້າ ດ້ວຍເຮືອບິນ ຜູ້ປະກອບການຕ້ອງປະຕິບັດຕາມກົດລະບຽບການຂົນສົ່ງສັດນໍ້າທີ່ມີຊີວິດ ຂອງສະມາຄົມຂົນສົ່ງທາງອາກາດລະຫວ່າງປະເທດ (International Air Transport Association: Live Aquatic Animal Regulation, General Container Requiments for Aquatic).

ມາດຕາ 26ການຂົນສົ່ງຜະລິດຕະພັນສັດນໍ້າ ເພື່ອການບໍລິໂພກ

ການຂົນສົ່ງຜະລິດຕະພັນ​ສັດ​ນໍ້າ ສໍາລັບ​ການບໍລິໂພກ​ ເປັນຕົ້ນ ປາ, ສັດນໍ້າເປັນໂຕທີ່ຕາຍແລ້ວ, ຊີ້ນປາ, ຊີ້ນສັດນໍ້າທີ່ແຍກເປັນສິ້ນສ່ວນ ຫຼື ຊອຍແລ້ວ ​ຄວນຂົນສົ່ງ​ໃນສະພາບທີ່ມີຄວາມເຢັນ ແລະ ປະຕິບັດມາດຕະການຄວບຄຸມຄວາມປອດໄພຂອງອາຫານທີ່ ກະຊວງສາທາລະນະສຸກ ກໍານົດ.

ໝວດທີ 6
ຂໍ້ຫ້າມ

ມາດຕາ 27ຂໍ້ຫ້າມທົ່ວໄປ​

ຫ້າມ ບຸກຄົນ, ນິຕິບຸກຄົນ ແລະ ການຈັດຕັ້ງ ມີພຶດຕິກໍາ ດັ່ງນີ້:

1. ນໍາເຂົ້າ, ສົ່ງ​ອອກ ແລະ ສົ່ງ​ຜ່ານ ສັດນໍ້າປະເພດເກືອດຫ້າມ ຕາມທີ່ ກົມລ້ຽງສັດ ແລະ ການປະ ມົງ ກໍານົດ;
2. ນໍາ​ເຂົ້າ, ສົ່ງອອກ ແລະ ສົ່ງຜ່ານ ຜະລິດຕະພັນສິນຄ້າກ່ຽວກັບສັດນໍ້າ ທີ່ປົນເປື້ອນສານເຄມີທີ່ ເປັນອັນຕະລາຍຕໍ່ຜູ້ບໍລິໂພກ;
3. ​ນໍາເຂົ້າ ສັດນໍ້າ ແລະ ​ຜະ​ລິດ​ຕະ​ພັນ​ສັດນໍ້າ ຈາກປະເທດ ຫຼື ເຂດໃດໜຶ່ງ ຂອງປະເທດສົ່ງອອກທີ່ເກີດການລະບາດຂອງສັດນໍ້າທີ່ຈໍາເປັນຕ້ອງແຈ້ງ;
4. ​ນໍາເຂົ້າ, ສົ່ງອອກ ແລະ ສົ່ງຜ່ານ ​ຜະ​ລິດ​ຕະ​ພັນ​ສັດນໍ້າ ທີ່ບໍ່ເໝາະສົມສໍາລັບການບໍລິໂພກ ຫຼື ບໍ່ສາມາດໃຊ້ເປັນປະໂຫຍດໄດ້ ຫຼື ບໍ່ໄດ້ຜ່ານການບໍາບັດ-ຂ້າເຊື້ອຕາມຫຼັກວິຊາການທີ່ກົມລ້ຽງສັດ ແລະ ການປະມົງ ກໍານົດ;
5. ນໍາເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ ປະເພດຄຸ້ມຄອງ ແລະ ຫວງຫ້າມ ພາຍໃຕ້ຂໍ້ຕົກລົງຂອງສົນທິສັນຍາສາກົນ ວ່າດ້ວຍການຄ້າຂາຍຊະນິດພັນສັດປ່າ ແລະ ພືດປ່າທີ່ໃກ້ຈະສູນພັນລະຫວ່າງຊາດ (CITES) ທີ່ບໍ່ໄດ້ຮັບການອະນຸຍາດ;
6. ນໍາເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ ເຂົ້າ-ອອກ ດ່ານທີ່ບໍ່ໄດ້ກໍານົດຢູ່ໃນໃບອະນຸຍາດ;
7. ຖອກນໍ້າເສຍທີ່ນໍາໃຊ້ ສໍາລັບການຂົນສົ່ງສັດນໍ້າ ທີ່ປົນເປື້ອນດ້ວຍ ເຊື້ອພະຍາດ ຫຼື ສານເຄມີທີ່ເປັນອັນຕະລາຍ ລົງສູ່ຫ້ວຍ​ຮ່ອງ, ຄອງລະບາຍນໍ້າ ຫຼື ​ແຫຼ່ງນໍ້າທໍາມະຊາດ​;
8. ມີພຶດຕິກຳອື່ນ ທີ່ເປັນການລະເມີດ ກົດໝາຍ ແລະ ລະບຽບການ.

ມາດຕາ 28​ຂໍ້ຫ້າມສໍາລັບພະນັກງານ ແລະ ເຈົ້າໜ້າທີ່

ຫ້າມ ພະນັກງານ-ລັດຖະກອນ ແລະ ເຈົ້າໜ້າທີ່ສັດຕະວະ​ແພດ ມີພຶດຕິກໍາ ດັ່ງນີ້:

1. ສວຍ​ໃຊ້​ ສິດ, ໜ້າທີ່ ​ແລະ​ ຕໍາແໜ່ງ ເພື່ອບັງຄັບ, ນາບ​ຂູ່,  ກົດໜ່ວງ, ຖ່ວງດຶງ ​ຫຼື ຮຽກເອົາ​ສິນ​ບົນ ຊຶ່​ງກໍ່ໃຫ້ເກີດຄວາມ​ເສຍ​ຫາຍ​ ແກ່​ຜົນປະ​ໂຫຍ​ດຂອງ ລັດ, ລວມໝູ່ ແລະ ບຸກຄົນ;
2. ເປີດ​ເຜີຍ​ຄວາມ​ລັບ ຂອງ ລັດ ຫຼື ທາງລັດຖະການ, ບຸກຄົນ, ນິຕິບຸກຄົນ ຫຼື ການ​ຈັດ​ຕັ້ງ;
3. ປອມ​ແປງ​ເອກະສານ ຫຼື ອອກ​ເອກະສານ​ ບໍ່​ຖືກຕ້ອງ;
4. ປະຕິບັດ​ໜ້າ​ທີ່​ ດ້ວຍ​ຄວາມ​ປະໝາດ, ເມີນເສີຍ, ຂາດຄວາມຮັບຜິດຊອບ ແລະ ຈັນຍາບັນ ທີ່​ກໍ່​ໃຫ້​ເກີດ​ຄວາມ​ເສຍ​ຫາຍ ​ຕໍ່ ລັດ, ບຸກຄົນ, ນິຕິບຸກຄົນ ຫຼື ການ​ຈັດ​ຕັ້ງ;
5. ຮຽກເອົາ ຄ່າ​ທຳນຽມ, ຄ່າ​ບໍລິການ ແລະ ນຳໃຊ້ລາຍຮັບວິຊາການບໍ່ຖືກຕ້ອງຕາມລະບຽບການ;
6. ມີພຶດຕິກຳອື່ນ ທີ່ເປັນການລະເມີດ ກົດໝາຍ ແລະ ລະບຽບການ.

ໝວດທີ 7
ການຄຸ້ມຄອງ​ ແລະ ກວດກາ ການນໍາເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ

ມາດຕາ 29​ອົງການຄຸ້ມຄອງ ແລະ ກວດກາ​

ອົງການຄຸ້ມຄອງ ແລະ ກວດກາ ການນໍາເຂົ້າ, ສົ່ງອອກ ແລະ ສົ່ງຜ່ານສັດນໍ້າ ແລະ ຜະລິດຕະພັນສັດນໍ້າ ແມ່ນອັນດຽວກັນກັບອົງການຄຸ້ມຄອງການປະມົງ ຊຶ່ງປະກອບດ້ວຍ:

1. ອົງການຄຸ້ມຄອງການປະມົງຂັ້ນສູນກາງ ແມ່ນ ກົມລ້ຽງສັດ ແລະ ການປະມົງ;
2. ອົງການຄຸ້ມຄອງການປະມົງຂັ້ນແຂວງ ແມ່ນ ຂະແໜງລ້ຽງສັດ ແລະ ການປະມົງ;
3. ອົງການຄຸ້ມຄອງການປະມົງຂັ້ນເມືອງ ແມ່ນ ຫ້ອງການກະສິກໍາ ແລະ ປ່າໄມ້;
4. ດ່ານ​ກວດກາ​ສັດຕະວະ​ແພດ.

ມາດຕາ 30ສິດ ​ແລະ​ ໜ້າ​ທີ່ ​ຂອງ​ ກົມລ້ຽງສັດ ແລະ ການປະມົງ

​ໃນການຄຸ້ມຄອງວຽກງານ ນຳເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ, ກົມລ້ຽງສັດ ແລະ ການປະມົງ ມີສິດ ແລະ​ ໜ້າ​ທີ່​ ດັ່ງ​ນີ້:

1. ສ້າງ​​ລະ​ບົບ​ການຄວບ​ຄຸມ​ ແລະ​ ຕິດ​ຕາມ ​ກວດ​ກາ ການ​ນໍາ​ເຂົ້າ​, ສົ່ງອອກ ແລະ ສົ່ງຜ່ານ ສັດນໍ້າ ແລະ ​ຜະ​ລິດ​ຕະ​ພັນ​ສັດນໍ້າ​ ຂອງ ສປປ​ ລາວ​ ໃຫ້ມີຄວາມເປັນເອກະພາບໃນຂອບເຂດທົ່ວປະເທດ;
2. ຮ່າງມາດຕະຖານເຕັກນິກ ແລະ ລະບຽບການສະເພາະ ກ່ຽວກັບການນໍຳເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ ເພື່ອສະ​ເໜີ  ກະຊວງກະສິກຳ ແລະ ປ່າໄມ້ ຮັບຮອງປະກາດໃຊ້;
3. ພັດ​ທະ​ນາ​ ຄູ່​ມື​ ແລະ ຄໍາແນະ​ນໍາ​ດ້ານ​ວິ​ຊາ​ການ, ຄູ່​ມືກ່ຽວກັບການກວດ​ກາການນໍາເຂົ້າ, ສົ່ງອອກ ແລະ ສົ່ງຜ່ານ ໃຫ້ສອດຄ່ອງ ແລະ ຮັດກຸມ ເພື່ອເປັນບ່ອນອີງໃຫ້ແກ່ເຈົ້າໜ້າທີ່ ຫຼື ການຈັດຕັ້ງ ທີ່ໄດ້ຮັບມອບໝາຍ ໄດ້ນຳໃຊ້ຢ່າງເປັນເອກະພາບ​​​​;
4. ດຳເນີນການ​ປະ​ເມີນ​ຄວາມ​ສ່ຽງ​, ກວດກາ ແລະ ຢັ້ງຢືນ ດ້ານສຸຂານາໄມສັດນໍ້າ;
5. ປຶກສາຫາລື ກັບປະເທດຄູ່ຄ້າ ກ່ຽວກັບການ​ກໍາ​ນົດ​ຄວາມ​ເທົ່າທຽມກັນ​, ຮັບຮູ້​ມາດ​ຕະ​ການໃນການຄວບຄຸມ​ການ​ນໍາ​ເຂົ້າ, ສົ່ງອອກ ແລະ ສົ່ງຜ່ານ ລະຫວ່າງ ສປປ ລາວ ກັບ ຕ່າງປະເທດ​;
6. ​ອອກ, ໂຈະ ​ຫຼື ​ຖອນ​ໃບອະນຸຍາດ ​ນໍາ​ເຂົ້າ, ສົ່ງອອກ ແລະ ສົ່ງຜ່ານ​ສັດ​ນໍ້າ ​ແລະ ຜະລິດ​ຕະພັນ​ສັດ​ນໍ້າ;
7. ຊີ້ນຳດ່ານກວດກາສັດຕະວະແພດ ແລະ ຄຸ້ມຄອງການ​ນໍາ​ເຂົ້າ​, ສົ່ງອອກ ແລະ ສົ່ງຜ່ານ ​ສັດນໍ້າ​ ແລະ ຜະລິດຕະພັນສັດນໍ້າ;
8. ເຝົ້າ​ລະ​ວັງ, ກັນ ແລະ ນໍາໃຊ້ມາດຕະການຄວບຄຸມພະຍາດສັດນໍ້າ ຢູ່ໃນຂະບວນການນໍາເຂົ້າ, ສົ່ງອອກ ແລະ ສົ່ງຜ່ານ;
9. ສ້າງສິ່ງອໍານວຍຄວາມສະດວກ ໃຫ້ແກ່ການ​ກັກ​ກັນກ່ອນສົ່ງອອກ ແລະ ຫຼັງການນໍາເຂົ້າ;
10. ນໍາໃຊ້ມາດຕະການຕໍ່ຜູ້ລະເມີດ ລະບຽບການນໍຳເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະ ລິດຕະພັນສັດນໍ້າ ເປັນຕົ້ນ ບໍ່ຕໍ່ໃບອະນຸຍາດ, ສັ່ງໃຫ້ສົ່ງກັບ ຫຼື​ ​ທໍາ​ລາຍ​;
11. ຮັບ ​ແລະ ​ແກ້​ໄຂ​ ຄໍາ​ສະ​ເໜີກ່ຽວກັບ ​ການ​ນໍາ​ເຂົ້າ, ສົ່ງ​ອອກ ​ແລະ ສົ່ງ​ຜ່ານ​ສັດ​ນໍ້າ ​ແລະ​ ຜະລິດ​ຕະພັນ​ສັດ​ນໍ້າ;
12. ລາຍ​ງານ ການຈັດຕັ້ງປະຕິບັດ​ວຽກງານ ຄວບ​ຄຸມ​ການ​ນໍາ​ເຂົ້າ, ສົ່ງ​ອອກ ​ແລະ ສົ່ງ​ຜ່ານ​ສັດ​ນໍ້າ ແລະ​ ຜະລິດ​ຕະພັນ​ສັດ​ນໍ້າ ​ໃຫ້​ກະຊວງ​ກະສິກໍາ ​ແລະ ປ່າ​ໄມ້ ຢ່າງ​ເປັນ​ປົກກະຕິ;
13. ນໍາໃຊ້ສິດ ແລະ ປະຕິບັດໜ້າທີ່ອື່ນ ຕາມກົດໝາຍ ແລະ ລະບຽບການ.

ມາດຕາ 31 ສິດ ​ແລະ ໜ້າ​ທີ່​ ຂອງ ຂະແໜງລ້ຽງສັດ ແລະ ການປະມົງຂັ້ນແຂວງ

ໃນການຄຸ້ມຄອງວຽກງານນຳເຂົ້າ, ສົ່ງອອກ ແລະ ສົ່ງຜ່ານສັດນໍ້າ ແລະ ຜະລິດຕະພັນສັດນໍ້າ, ຂະແໜງ ລ້ຽງສັດ ແລະ ການປະມົງຂັ້ນແຂວງ ມີສິດ​ ແລະ​ ໜ້າ​ທີ່ ຕາມ​ຂອບ​ເຂດ​ຄວາມ​ຮັບຜິດຊອບ​ຂອງ​ຕົນ ດັ່ງ​ນີ້:

1. ຈັດຕັ້ງປະຕິບັດ ແຜນ​ການຄວບ​ຄຸມ​ ແລະ​ ຕິດ​ຕາມ ​ກວດ​ກາ ການ​ນໍາ​ເຂົ້າ, ສົ່ງອອກ​ ແລະ ສົ່ງຜ່ານສັດນໍ້າ ​ແລະ ​ຜະ​ລິດ​ຕະ​ພັນ​ສັດນໍ້າ​ ຂອງ ອົງການຄຸ້ມຄອງການປະມົງຂັ້ນສູນກາງ;
2. ຕິດຕາມ, ກວດກາ ແລະ ລາຍງານ ການປະຕິບັດມາດຕະຖານເຕັກນິກ ແລະ ລະບຽບການກ່ຽວກັບການນໍຳເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ;
3. ເຂົ້າຮ່ວມການ​ປະ​ເມີນ​ຄວາມ​ສ່ຽງ ແລະ ກວດກາການນໍາເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ;
4. ຄຸ້ມຄອງການ​ນໍາ​ເຂົ້າ, ສົ່ງອອກ​ ແລະ ສົ່ງຜ່ານ ​ສັດນໍ້າ​ ແລະ ຜະລິດຕະພັນສັດນໍ້າ;
5. ນຳໃຊ້ມາດຕະການດ້ານວິຊາການ ເປັນຕົ້ນ ການເຝົ້າ​ລະ​ວັງ, ກັນ, ຄວບຄຸມ ແລະ ກຳຈັດພະຍາດສັດນໍ້າ ຫຼື ທຳລາຍສິ່ງທີ່ເປັນອັນຕະລາຍ ຢູ່ໃນຂະບວນການນໍາເຂົ້າ, ສົ່ງອອກ ແລະ ສົ່ງຜ່ານ;
6. ນໍາໃຊ້ມາດຕະການຕໍ່ຜູ້ທີ່ລະເມີດ ລະບຽບການນໍຳເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ ເປັນຕົ້ນ ສະ​ເໜີ ງົດຕໍ່ໃບອະນຸຍາດ, ໂຈະ ຫຼື ຍົກເລີກ​ໃບ​ອະນຸຍາດ, ສັ່ງໃຫ້ສົ່ງກັບ ຫຼື​ ​ທໍາ​ລາຍ​;
7. ຈັດຕັ້ງປະຕິບັດຄໍາແນະ​ນໍາ​ດ້ານ​ວິ​ຊາ​ການ ກ່ຽວກັບການກວດ​ກາ​ການນໍາເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ ທີ່ ອົງການຄຸ້ມຄອງການປະມົງຂັ້ນສູນກາງ ກຳນົດ;
8. ອຳນວຍຄວາມສະດວກ ແລະ ກວດກາ ໃນການ​ກັກ​ກັນກ່ອນການສົ່ງອອກ, ຫຼັງການນໍາເຂົ້າ​ ແລະ ລະຫວ່າງການສົ່ງຜ່ານ;
9. ຮັບ ​ແລະ ​ແກ້​ໄຂ​ຄໍາ​ສະ​ເໜີກ່ຽວກັບ ​ການ​ນໍາ​ເຂົ້າ, ສົ່ງ​ອອກ ​ແລະ ສົ່ງ​ຜ່ານ​ສັດ​ນໍ້າ ​ແລະ​ ຜະລິດ ຕະພັນ​ສັດ​ນໍ້າ;
10. ລາຍ​ງານ ການຈັດຕັ້ງປະຕິບັດ​ວຽກງານ ຄວບ​ຄຸມ​ການ​ນໍາ​ເຂົ້າ, ສົ່ງ​ອອກ ​ແລະ ສົ່ງ​ຜ່ານ​ສັດ​ນໍ້າ ແລະ ​ຜະລິດ​ຕະພັນ​ສັດ​ນໍ້າ ​ໃຫ້​ກົມ​ລ້ຽງສັດ ​ແລະ ການ​ປະມົງ ແລະ ພະ​ແນ​ກກະສິກໍາ ​ແລະ ປ່າ​ໄມ້​ຂັ້ນ​ແຂວງ ຢ່າງ​ເປັນ​ປົກກະຕິ;
11. ນໍາໃຊ້ສິດ ແລະ ປະຕິບັດໜ້າທີ່ອື່ນ ຕາມກົດໝາຍ ແລະ ລະບຽບການ.

ມາດຕາ 32ສິດ ​ແລະ ໜ້າ​ທີ່​ ຂອງຫ້ອງການກະສິກໍາ ແລະ ປ່າໄມ້ຂັ້ນເມືອງ

ໃນການຄຸ້ມຄອງວຽກງານ ນຳເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ, ຫ້ອງ ການກະສິກໍາ ແລະ ປ່າໄມ້ຂັ້ນເມືອງ ມີສິດ ແລະ ໜ້າທີ່ ຕາມ​ຂອບ​ເຂດ​ຄວາມ​ຮັບຜິດຊອບ​ຂອງ​ຕົນ ດັ່ງ​ນີ້:

1. ຊ່ວຍ ອົງການຄຸ້ມຄອງການປະມົງຂັ້ນແຂວງ ໃນການຈັດຕັ້ງປະຕິບັດແຜນ​ການຄວບ​ຄຸມ​ ແລະ​ ຕິດ​ຕາມ​ກວດ​ກາ ການ​ນໍາ​ເຂົ້າ​, ສົ່ງອອກ ແລະ ສົ່ງຜ່ານ ສັດນໍ້າ ​ແລະ ​ຜະ​ລິດ​ຕະ​ພັນ​ສັດນໍ້າ​;
2. ເຂົ້າຮ່ວມການ​ປະ​ເມີນ​ຄວາມ​ສ່ຽງ ແລະ ກວດກາການນໍາເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ;
3. ນຳໃຊ້ມາດຕະການດ້ານວິຊາການ ເປັນຕົ້ນ ການເຝົ້າ​ລະ​ວັງ, ກັນ, ຄວບຄຸມ ແລະ ກຳຈັດພະຍາດສັດນໍ້າ ຫຼື ທຳລາຍສິ່ງທີ່ເປັນອັນຕະລາຍ ຢູ່ໃນຂະບວນການນໍາເຂົ້າ, ສົ່ງອອກ ແລະ ສົ່ງຜ່ານ  ຕາມການມອບໝາຍຂອງ ພະ​ແນ​ກກະສິກໍາ ​ແລະ ປ່າ​ໄມ້ຂັ້ນແຂວງ;
4. ສະເໜີ ພະ​ແນ​ກກະສິກໍາ ​ແລະ ປ່າ​ໄມ້ຂັ້ນແຂວງ ນໍາໃຊ້ມາດຕະການຕໍ່ຜູ້ທີ່ບໍ່ໃຫ້ຄວາມຮ່ວມມືໃນການປະຕິບັດເງື່ອນໄຂການນໍຳເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ ຂອງ ສປປ ລາວ ເປັນຕົ້ນ ບໍ່ຕໍ່ໃບອະນຸຍາດ, ການໂຈະ-ຍົກເລີກ, ການສັ່ງໃຫ້ສົ່ງກັບ ຫຼື​ ​ທໍາ​ລາຍ​;
5. ​ຈັດຕັ້ງປະຕິບັດຄໍາແນະ​ນໍາ​ດ້ານ​ວິ​ຊາ​ການ ກ່ຽວກັບການກວດ​ກາ​ການນໍາເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ ທີ່ ອົງການຄຸ້ມຄອງການປະມົງຂັ້ນສູນກາງ ກຳນົດ;
6. ອຳນວຍຄວາມສະດວກ ແລະ ກວດກາ ໃນການ​ກັກ​ກັນກ່ອນສົ່ງອອກ, ຫຼັງການນໍາເຂົ້າ​,  ແລະລະຫວ່າງການສົ່ງຜ່ານ;
7. ຮັບ ​ແລະ ​ແກ້​ໄຂ​ຄໍາ​ສະ​ເໜີກ່ຽວກັບ ​ການ​ນໍາ​ເຂົ້າ, ສົ່ງ​ອອກ ​ແລະ ສົ່ງ​ຜ່ານ​ສັດ​ນໍ້າ ​ແລະ​ ຜະລິດ ຕະພັນ​ສັດ​ນໍ້າ;
8. ລາຍ​ງານ ການຈັດຕັ້ງປະຕິບັດ​ວຽກງານ ​ນໍາ​ເຂົ້າ, ສົ່ງ​ອອກ ​ແລະ ສົ່ງ​ຜ່ານ​ສັດ​ນໍ້າ ​ແລະ​ ຜະລິດ​ຕະ ພັນ​ສັດ​ນໍ້າ ​ໃຫ້​ພະ​ແນ​ກ​ກະສິກໍາ ​ແລະ ປ່າ​ໄມ້ຂັ້ນ​ແຂວງ ​ແລະ ອົງການ​ປົກຄອງ​ຂັ້ນ​ເມືອງ ຢ່າງ​ເປັນ​ປົກກະຕິ;
9. ນໍາໃຊ້ ສິດ ແລະ ປະຕິບັດໜ້າທີ່ອື່ນ ຕາມກົດໝາຍ ແລະ ລະບຽບການ.

​ມາດຕາ 33ສິດ ແລະ ໜ້າທີ່ຂອງດ່ານກວດກາສັດຕະວະແພດ​

ໃນການຄຸ້ມຄອງວຽກງານ ນໍາເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ, ດ່ານກວດກາສັດຕະວະແພດ ມີສິດ ແລະ ໜ້າທີ່ ຕາມ​ຂອບ​ເຂດ​ຄວາມ​ຮັບຜິດຊອບ​ຂອງ​ຕົນ ດັ່ງນີ້:

1. ສະກັດກັ້ນ ການລະເມີດກົດໝາຍ ແລະ ລະບຽບການ ກ່ຽວກັບ ການລ້ຽງສັດ ແລະ ສັດຕະວະ ແພດ ແລະ ການປະມົງ;
2. ກວດກາ, ອຳນວຍຄວາມສະດວກ ໃຫ້ແກ່ການ ນຳເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ  ຜະລິດຕະພັນສັດນໍ້າ ຕາມກົດໝາຍ ແລະ ລະບຽບການ;
3. ກວດກາ, ພິຈາລະນາ ແລະ ຢັ້ງຢືນຄວາມຖືກຕ້ອງ ຂອງຜະລິດຕະພັນສິນຄ້າປະມົງ ແລະ ເອກະ ສານທີ່ກ່ຽວຂ້ອງໃນການນຳເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ;
4. ນຳໃຊ້ມາດຕະການສຸຂານາໄມ ເປັນຕົ້ນ ກັກ, ສົ່ງຕົວຢ່າງໄປວິໄຈ, ບໍາບັດ, ປະຕິເສດການນໍາເຂົ້າ, ສົ່ງກັບຄືນ, ທໍາລາຍສັດນໍ້າ, ຜະລິດຕະພັນສັດນໍ້າ ຫຼື ວັດຖຸ ທີ່ປົນເປື້ອນດ້ວຍເຊື້ອພະຍາດສັດນໍ້າທີ່ຈໍາເປັນຕ້ອງແຈ້ງ;
5. ເກັບກຳຂໍ້ມູນເບື້ອງຕົ້ນ ກ່ຽວກັບການກະທຳຜິດ ແລະ ລາຍງານໃຫ້ການຈັດຕັ້ງ ແລະ ເຈົ້າໜ້າທີ່ ທີ່ກ່ຽວຂ້ອງ ເພື່ອແກ້ໄຂຕາມກົດໝາຍ ແລະ ລະບຽບການ;
6. ເກັບ ຄ່າທຳນຽມ ແລະ ຄ່າບໍລິການດ້ານວິຊາການ ພ້ອມ​ທັງ​ຄຸ້ມ​ຄອງ, ນໍາ​ໃຊ້ ຕາມລະບຽບການ;
7. ປະສານສົມທົບກັບພາກສ່ວນອື່ນທີ່ກ່ຽວຂ້ອງ ໃນການຈັດຕັ້ງປະຕິບັດໜ້າທີ່ຂອງຕົນ;
8. ຮັບ ​ແລະ ​ແກ້​ໄຂ​ຄໍາ​ສະ​ເໜີກ່ຽວກັບ ​ການ​ນໍາ​ເຂົ້າ, ສົ່ງ​ອອກ ​ແລະ ສົ່ງ​ຜ່ານ​ສັດ​ນໍ້າ ​ແລະ​ ຜະລິດ ຕະພັນ​ສັດ​ນໍ້າ;
9. ລາຍງານການຈັດຕັ້ງປະຕິບັດວຽກງານຂອງຕົນໃຫ້ ອົງການຄຸ້ມຄອງການປະມົງ ຕາມການແບ່ງຂັ້ນຄຸ້ມຄອງ ຢ່າງເປັນປົກກະຕິ;
10. ນຳໃຊ້ ສິດ ແລະ ປະຕິບັດໜ້າທີ່ອື່ນ ຕາມກົດໝາຍ ແລະ ລະບຽບການ.

ມາດຕາ 34ສິດ ແລະ ໜ້າທີ່ ຂອງເຈົ້າໜ້າທີ່ສັດຕະວະແພດ

ໃນການຄຸ້ມຄອງວຽກງານ ນໍາເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ  ຜະລິດຕະພັນສັດນໍ້າ, ​ເຈົ້າໜ້າທີ່ສັດຕະວະແພດ ມີສິດ ແລະ ໜ້າທີ່ ຕາມ​ຂອບ​ເຂດ​ຄວາມ​ຮັບຜິດຊອບ​ຂອງ​ຕົນ ດັ່ງນີ້:

1. ກວດກາສະຖານທີ່ນໍາເຂົ້າ, ສົ່ງອອກ, ສົ່ງຜ່ານ, ສະຖານທີ່ກັກກັນ, ສະຖານທີ່ເຕົ້າໂຮມສັດນໍ້າ ແລະ ສະຖານທີ່ກ່ຽວຂ້ອງອື່ນ ລວມທັງສະຖານທີ່ເກັບຮັກສາຜະລິດຕະພັນສັດນໍ້າ, ຍານພາຫະນະບັນທຸກ ໃນໂມງລັດຖະການ ຫຼື ຕາມການມອບໝາຍ ໃນກໍລະນີທີ່ມີເຫດການສົງໄສວ່າມີການກະທຳຜີດ ຫຼື ລະເມີດກົດໝາຍ ຫຼື ລະບຽບການ;
2. ກວດກາເອກະສານກ່ຽວຂ້ອງກັບສັດນໍ້າ ແລະ ຜະລິດຕະພັນສັດນໍ້າ ລວມທັງ ວິທີການລ້ຽງ ຫຼື ວິທີການເກັບຮັກສາຜະລິດຕະພັນສັດນໍ້າ;
3. ເກັບຕົວຢ່າງ ​ເພື່ອການກວດກາວິໄຈຊອກຫາພະຍາດ ແລະ ສິ່ງທີ່ເປັນອັນຕະລາຍ ພ້ອມທັງສືບສວນ-ສອບສວນຫາຂໍ້ມູນທີ່ແທ້ຈິງ;
4. ກວດຄົ້ນ, ຢຶດ ສັດນໍ້າ ຫຼື ຜະລິດຕະພັນສັດນໍ້າ ທີ່ບໍ່ໄດ້ຮັບອະນຸຍາດ, ຕິດ  ຫຼື  ປົນເປື້ອນດ້ວຍເຊື້ອພະຍາດ ແລະ ສິ່ງທີ່ເປັນອັນຕະລາຍ  ລວມທັງເຄື່ອງມື,  ເຄື່ອງໃຊ້,  ພາຊະນະບັນຈຸ,  ຫີບຫໍ່, ສະຫຼາກ ແລະ ເອກະສານ ຫຼື ວັດຖຸອື່ນ ທີ່ມີເຫດອັນຄວນທີ່ເຊື່ອໄດ້ວ່າມີການກ່ຽວຂ້ອງກັບການກະທໍາຄວາມຜິດ ຫຼື ລະເມີດກົດໝາຍ ​ແລະ ຂໍ້ຕົກລົງສະບັບນີ້;
5. ສະເໜີໃຫ້ບຸກຄົນ ມາໃຫ້ປາກຄໍາ ຫຼື ຮຽກເອົາເອກະສານ ຫຼື ຫຼັກຖານ ເພື່ອປະກອບການພິ ຈາລະນາຂອງພະນັກງານ ແລະ ເຈົ້າໜ້າທີ່;
6. ປະສານຫາຜູ້ໄດ້ຮັບອະນຸຍາດ ແລະ ຜູ້ມີໜ້າທີ່ກ່ຽວຂ້ອງກັບ ການຜະລິດ, ຈໍາໜ່າຍ, ນໍາເຂົ້າ ຫຼື ສົ່ງອອກ ແລະ ໃຫ້ອຳນວຍຄວາມສະດວກ ໃຫ້ແກ່ການປະຕິບັດໜ້າທີ່ຂອງເຈົ້າໜ້າທີ່;
7. ສະແດງບັດສະເພາະເຈົ້າໜ້າທີ່ສັດຕະວະແພດ ໃນເວລາປະຕິບັດງານ ຕໍ່ບຸກຄົນທີ່ກ່ຽວຂ້ອງ;
8. ລາຍງານການຈັດຕັ້ງປະຕິບັດ​ວຽກງານ​ຂອງ​ຕົນ​ໃຫ້ການ​ຈັດຕັ້ງ ຢ່າງເປັນປົກກະຕິ ແລະ ໃນກໍລະ ນີພົບການລະເມີດ ຫຼື ບໍ່ໃຫ້ຄວາມຮ່ວມມືຂອງຜູ້ປະກອບການ;
9. ນໍາ​ໃຊ້ ສິດ ແລະ ປະຕິບັດໜ້າທີ່ອື່ນ ຕາມກົດໝາຍ ແລະ ລະບຽບການ.

ມາດຕາ 35ການກວດກາວຽກງານ ນໍາເຂົ້າ, ສົ່ງອອກ ແລະ ສົ່ງຜ່ານ ສັດນໍ້າ ແລະ ຜະລິດຕະພັນສັດນໍ້າ

ການກວດກາວຽກງານ ນໍາເຂົ້າ, ສົ່ງອອກ ແລະ ສົ່ງຜ່ານສັດນໍ້າ ແລະ ຜະລິດຕະພັນສັດນໍ້າ ​ແມ່ນ​ການ​ກວດກາ​ການຈັດຕັ້ງປະຕິບັດ​ລະບຽບກົດໝາຍກ່ຽວກັບ​ສັດ​ນໍ້າ ​ແລະ ຜະລິດ​ຕະພັນ​ສັດ​ນໍ້າ ເພື່ອໃຫ້ວຽກງານດັ່ງກ່າວ ຖືກຕ້ອງຕາມລະບຽບ, ກົດໝາຍ ຊຶ່ງ​ມີ ສາມ ຮູບ​ການ ດັ່ງນີ້:

1. ການກວດກາຕາມປົກກະຕິ ແມ່ນການກວດກາຕາມແຜນການຢ່າງເປັນປະຈຳ ແລະ ມີກຳນົດເວ ລາທີ່ແນ່ນອນ;
2. ການກວດກາໂດຍແຈ້ງໃຫ້ຮູ້ລ່ວງໜ້າ ແມ່ນການກວດການອກແຜນການ ໂດຍມີການແຈ້ງໃຫ້ຜູ້ຖືກກວດກາ ຮູ້ກ່ອນລ່ວງໜ້າ;
3. ການກວດກາແບບກະທັນຫັນ ແມ່ນການກວດກາຢ່າງຮີບດ່ວນ ໂດຍບໍ່ໄດ້ແຈ້ງໃຫ້ຜູ້ຖືກກວດກາຮູ້ລ່ວງໜ້າ.

ໝວດທີ 8
ບົດບັນ​ຍັດ​ສຸດ​ທ້າຍ

ມາດຕາ 36ການ​ຈັດຕັ້ງປະຕິ​ບັດ

ມອບໃຫ້ ກົມລ້ຽງສັດ ແລະ ການປະມົງ ເປັນໃຈກາງສົມທົບກັບພາກ​ສວ່ນ​ທີ່​ກ່ຽວ​ຂ້ອງ ທັງສູນກາງ ແລະ ທ້ອງຖິ່ນ ​ເພື່ອຈັດຕັ້ງປະຕິບັດຂໍ້ຕົກລົງສະບັບນີ້ ໃຫ້ມີ​ປະ​ສິດ​ທິ​ຜົນ.

ມາດຕາ 37ຜົນສັກສິດ

ຂໍ້​ຕົກ​ລົງສະບັບນີ້ ມີຜົນ​ສັກສິດ ນັບແຕ່ວັນລົງລາຍເຊັນ ແລະ ພາຍຫຼັງໄດ້ລົງ​ເຜີຍ​ແຜ່ໃນ​ຈົດໝາຍເຫດທາງລັດຖະການ ​ສິບ​ຫ້າ​ວັນ.

ຂໍ້​ກໍາ​ນົດ ແລະ ບົດບັນຍັດໃດ ​ທີ່ຂັດ​ກັບ​ຂໍ້​ຕົກ​ລົງສະບັບນີ້ ລ້ວນແຕ່ຖືກຍົກເລີກ​.

ລັດຖະມົນຕີ

ປອ. ລຽນ ທິແກ້ວ