ອີງຕາມ ຂໍ້ຕົກລົງ ວ່າດ້ວຍການຄວບຄຸມສານຊືນໃນນໍ້າສີ ຫຼື ຜະລິດຕະພັນເຄືອບ, ເລກທີ 4566/ກຊສ, ລົງວັນທີ 23 ສິງຫາ 2021. ເພື່ອກໍານົດລະບຽບການ ແລະ ມາດຕະການ ກ່ຽວກັບການຄວບຄຸມ ແລະ ຕິດຕາມ ກວດກາ ຄ່າມາດຕະຖານສ່ວນປະສົມຂອງສານຊືນໃນນໍ້າສີ ຫຼື ຜະລິດຕະພັນເຄືອບ ໃນການຜະລິດ ຫຼື ການນໍາເຂົ້ານໍ້າສີ ຫຼື ຜະລິດຕະພັນເຄືອບ ເພື່ອຮັບປະກັນບໍ່ໃຫ້ມີປະລິມານການປະສົມຂອງສານດັ່ງກ່າວ ເກີນມາດຕະຖານທີ່ກໍານົດໃວ້.
ສານຊືນ ໝາຍເຖິງ ສານຊືນທີ່ມີຊື່ເຄມີ ເລດ ສອງ ອາຊິເຕດ (Lead II acetate) ທີ່ຈັດໃນປະເພດໂລຫະໜັກ, ຈັດຢູ່ໃນກຸ່ມສີ່ເອ ຂອງຕາຕະລາງທາດມູນເຄມີ, ເລກອາຕອມ ແປດສິບສອງ, ມວນສານອາຕອມ ສອງຮ້ອຍເຈັດຈຸດສິບເກົ້າ. ຜະລິດຕະພັນເຄືອບ ໝາຍເຖິງ ຜະລິດຕະພັນທີ່ຢູ່ໃນພາວະ ແຫຼວ, ໜຽວ ຫຼື ເປັນຝຸ່ນ ທີ່ນໍາໃຊ້ ເພື່ອເຄືອບວັດສະດຸໃຫ້ເກີດຄວາມເຫຼື້ອມ, ເຄືອບເງົາ, ປ້ອງກັນການກັດເຊາະ ຫຼື ເຂົ້າໝ້ຽງ, ຕົບແຕ່ງ ເພື່ອຄວາມສວຍງາມ ຫຼື ສ້າງໃຫ້ເກີດຄຸນລັກສະນະສະເພາະໃດໜຶ່ງ.
ອີງຕາມ ມາດຕາ 6 ການຄວບຄຸມປະລິມານສ່ວນປະສົມຂອງສານຊືນໃນນໍ້າສີ ຫຼື ຜະລິດຕະພັນເຄືອບ ທີ່ນໍາເຂົ້າ ຂອງຂໍ້ຕົກລົງສະບັບດັ່ງກ່າວມານັ້ນ ສໍາລັບ ບຸກຄົນ, ນິຕິບຸກຄົນ ຫຼື ການຈັດຕັ້ງ ທີ່ມີຈຸດປະສົງນໍາເຂົ້ານໍ້າສີ ຫຼື ຜະລິດຕະພັນເຄືອບ ທີ່ມີສ່ວນປະສົມຂອງສານຊືນ ທຸກຄັ້ງຕ້ອງສະເໜີແຜນການນໍາເຂົ້າ ໂດຍມີເອກະສານຢັ້ງຢືນຜົນການວິໄຈປະລິມານສ່ວນປະສົມຂອງສານຊືນໃນນໍ້າສີ ຫຼື ຜະລິດຕະພັນເຄືອບ ຈາກຫ້ອງທົດລອງເອກະລາດທີ່ໄດ້ມາດຕະຖານຂອງປະເທດຜູ້ຜະລິດ ຫຼື ປະເທດອື່ນ ໃຫ້ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ຂັ້ນແຂວງ ແລະ ຕ້ອງພິຈາລະນາ ເຫັນດີ ຫຼື ບໍ່ເຫັນດີ ໃຫ້ສໍາເລັດພາຍໃນ ຫ້າ ວັນລັດຖະການ ນັບແຕ່ມື້ໄດ້ຮັບການສະເໜີເປັນຕົ້ນໄປ. ຈາກນັ້ນ, ຈຶ່ງສະເໜີຂໍການນໍາເຂົ້າຈາກຂະແໜງການອຸດສາຫະກໍາ ແລະ ການຄ້າ.
ຄ່າມາດຕະຖານສ່ວນປະສົມຂອງສານຊືນໃນນໍ້າສີ ຫຼື ຜະລິດຕະພັນເຄືອບ ທີ່ນໍາໃຊ້ເຂົ້າໃນການຜະລິດ ແລະ ການນໍາເຂົ້າ ແມ່ນບໍ່ໃຫ້ເກີນ ເກົ້າສິບ ພີພີເອັມ (90 ppm).
ໝາຍເຫດ: ເອກະສານຢັ້ງຢືນການຮັບຮອງຜົນການວິໄຈດັ່ງກ່າວ ທີ່ຢັ້ງຢືນການນໍາເຂົ້ານັ້ນ ຕ້ອງເກັບຮັກສາໄວ້ຢ່າງໜ້ອຍ ຫ້າ ປີ ເພື່ອເປັນຫຼັກຖານ ໃນການຕິດຕາມ ກວດກາຂອງພາກສ່ວນທີ່ກ່ຽວຂ້ອງ.
ອີງຕາມ ຂໍ້ຕົກລົງ ວ່າດ້ວຍ ການຂື້ນທະບຽນບັນຊີເຄມີ, ການນໍາເຂົ້າ, ສົ່ງອອກ ແລະ ສົ່ງຜ່ານເຄມີ, ເລກທີ 1204/ອຄ.ກອຫ, ລົງວັນທີ 24 ທັນວາ 2020 ໝວດທີ 2 ການຂື້ນທະບຽນທາດເຄມີ ມີລາຍະອຽດດັ່ງນີ້:
1. ການສະເໜີຂຶ້ນທະບຽນບັນຊີເຄມີ
- ຕ້ອງເປັນນິຕິບຸກຄົນທີ່ໄດ້ຂຶ້ນທະບຽນວິສາຫະກິດ ແລະ ໄດ້ຮັບອະນຸຍາດດຳເນີນທຸລະກິດເຄມີ ຖືກຕ້ອງຕາມກົດໝາຍ ແລະ ລະບຽບການ;
- ຕ້ອງປະກອບເອກະສານຍື່ນຕໍ່ກົມອຸດສາຫະກຳ ແລະ ຫັດຖະກຳ ໂດຍກົງ ຫຼື ຜ່ານລະບົບເອເລັກໂຕຣນິກ ໂດຍເອກະສານປະກອບ ດັ່ງນີ້: (1) ໜັງສືສະເໜີຂໍຂຶ້ນທະບຽນບັນຊີເຄມີ ຕາມແບບພິມ ທີ່ກົມອຸດສາຫະກຳ ແລະ ຫັດຖະກຳ ໄດ້ກຳນົດ; (2) ບົດປະເມີນຄວາມສ່ຽງເຄມີ ຕາມແບບພິມ ທີ່ກົມອຸດສາຫະກຳ ແລະ ຫັດຖະກຳ ໄດ້ກຳນົດ; (3) ເອກະສານຂໍ້ມູນຄວາມປອດໄພເຄມີຂອງຜູ້ຜະລິດ ເປັນພາສາລາວ ຫຼື ພາສາອັງກິດ; (4) ສຳເນົາໃບທະບຽນວິສາຫະກິດ, ໃບອະນຸຍາດດໍາເນີນທຸລະກິດ ຫຼື ໃບອະນຸຍາດລົງທຶນ ຕາມກິດຈະການການລົງທຶນ; ແລະ (5) ໃບຢັ້ງຢືນຜົນການວິເຄາະເຄມີຈາກຜູ້ຜະລິດ ຫຼື ຫ້ອງວິໄຈທີ່ໄດ້ຮັບອະນຸຍາດຖືກຕ້ອງ ໂດຍເປັນພາສາລາວ ຫຼື ພາສາອັງກິດ ໃນກໍລະນີເປັນທາດປະສົມ.
2. ການພິຈາລະນາຂຶ້ນທະບຽນບັນຊີເຄມີ
ພາຍຫຼັງໄດ້ຮັບເອກະສານຕາມທີ່ໄດ້ກຳນົດໄວ້ໃນ ມາດຕາ 5 ຂອງຂໍ້ຕົກລົງສະບັບນີ້ ຖືກຕ້ອງ ແລະ ຄົບຖ້ວນ ກົມອຸດສາຫະກຳ ແລະ ຫັດຖະກຳ ຕ້ອງອອກໃບທະບຽນບັນຊີເຄມີພາຍໃນ ສິບຫ້າ ວັນ ລັດຖະການ.
ໃນກໍລະນີເອກະສານ ບໍ່ຖືກຕ້ອງ ຫຼື ບໍ່ຄົບຖ້ວນ ຕາມທີ່ໄດ້ກຳນົດໄວ້ໃນ ມາດຕາ 5 ຂອງຂໍ້ຕົກລົງສະບັບນີ້ ກົມອຸດສາຫະກຳ ແລະ ຫັດຖະກຳ ຕ້ອງແຈ້ງເປັນລາຍລັກອັກສອນໃຫ້ຜູ້ສະເໜີຮັບຊາບ ພາຍໃນ ຫ້າ ວັນ ລັດຖະການ ນັບແຕ່ວັນໄດ້ຮັບເອກະສານ ເພື່ອໃຫ້ຜູ້ສະເໜີແກ້ໄຂໃຫ້ຄົບຖ້ວນ ແລະ ຖືກຕ້ອງ.
ໃນກໍລະນີທີ່ບໍ່ສາມາດອອກໃບທະບຽນບັນຊີເຄມີໄດ້ ຕ້ອງໄດ້ແຈ້ງເຫດຜົນເປັນລາຍລັກອັກສອນ ໃຫ້ຜູ້ສະເໜີຊາບພາຍໃນ ຫ້າ ວັນ ລັດຖະການ ນັບແຕ່ວັນທີ່ໄດ້ຮັບເອກະສານຄົບຖ້ວນ.
ຄ່າທໍານຽມແມ່ນອີງໃສ່ ລັດຖະບັນຍັດ ຂອງປະທານປະເທດ ວ່າດ້ວຍ ຄ່າທຳນຽມ ແລະ ຄ່າບໍລິການ, ສະບັບເລກທີ 002/ປປທ, ລົງວັນທີ 17 ມິຖຸນາ 2021 ໝວດທີ 3 ຂະແໜງການ ອຸດສາຫະກໍາ ແລະ ການຄ້າ, ມາດຕາ 19 ຄ່າທໍານຽມ.
ລາຍລະອຽດເພີ່ມເຕີບ ກະລຸນາຕິດຕໍ່ສອບຖາມໄດ້ທີ່
- ພະແນກ ສິ່ງແວດລ້ອມ ແລະ ເຄມີອຸດສາຫະກໍາ, ກົມ ອຸດສາຫະກໍາ ແລະ ຫັດຖະກໍາ, ກະຊວງ ອຸດສາຫະກໍາ ແລະ ການຄ້າ. ເບີໂທຕິດຕໍ່: 021 453495.
- ພະແນກເຄມີ ແລະ ສິ່ງເສດເຫຼືອ, ກົມຄວບຄຸມ ແລະ ຕິດຕາມກວດກາມົນລະພິດ, ກະຊວງ ຊັບພະຍາກອນ ແລະ ສິ່ງແວລ້ອມ. ເບີໂທຕິດຕໍ່: +856 21 739016 ຫຼື ແຟັກ: 021 739 016
ເວັບໄຊ໌: http://dpcm.monre.gov.la/
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.