ກະຊວງ ອຸດສາຫະກຳ ແລະ ການຄ້າ ອອກ ຄຳສັ່ງແນະນຳເພີ້ມຕີມ ສະບັບເລກທີ 1102/ອຄ.ກຂອ, ລົງວັນທີ 17 ມິຖຸນາ 2016 ກ່ຽວກັບ ການຜັນຂະຫຍາຍເນື້ອໃນຂໍ້ 4 ຂອງຄຳສັ່ງແນະນຳເລກທີ 1050/ອຄ.ກຂອ ລົງວັນທີ 13 ມິຖຸນາ 2016 ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາ ການຂຸດຄົ້ນໄມ້, ເຄື່ອນຍ້າຍໄມ້ ແລະ ທຸລະກິດໄມ້.
ໂດຍຄຳສັ່ງສະບັບນີ້ ໄດ້ຊີ້ແຈ້ງ ເພື່ອໃຫ້ພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງວຽງຈັນ ໄດ້ເຂົ້າໃຈໃນລາຍລະອຽດວ່າ: “ຜະລິດຕະພັນໄມ້ສຳເລັດຮູບທີ່ສົ່ງອອກໄປຕ່າງປະເທດ ແມ່ນບໍ່ຈໍາເປັນຕ້ອງມີໃບອະນຸຍາດສົ່ງອອກ”, ອີງຕາມ ແຈ້ງການ ເລກທີ 1904/ອຄ.ກຂອ ລົງວັນທີ 30 ກັນຍາ 2011 ວ່າດ້ວຍຂັ້ນຕອນການອອກອະນຸຍາດນໍາເຂົ້າ ແລະ ສົ່ງອອກໄມ້ ແລະ ຜະລິດຕະພັນໄມ້ ແລະ ແຈ້ງການເພີ້ມເຕີມ ເລກທີ 2857/ຫອຄ.ກຂອ ລົງວັນທີ 11 ພະຈິກ 2011 ກ່ຽວກັບການປັບປຸງເນື້ອໃນແຈ້ງການເລກທີ 1904/ອຄ.ກຂອ ລົງວັນທີ 30 ກັນຍາ 2011 ຂໍ້ 1.4. ດັ່ງນັ້ນ, ໃນຂໍ້ 4 ຂອງ ຄໍາສັ່ງແນະນໍາ ເລກທີ 1050/ອຄ.ກຂອ ລົງວັນທີ 13 ມິຖຸນາ 2016 ທີ່ລະບຸວ່າສຳລັບພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງໃຫ້ຢຸດເຊົາການອອກໃບອະນຸຍາດສົ່ງອອກໄມ້ທຸກປະເພດລວມທັງໄມ້ຜ່ານ ສປປ ລາວ ໄປຕ່າງປະເທດໃນທຸກກໍລະນີ ຈຶ່ງໝາຍເຖິງໄມ້ທຸກຊະນິດ ນອກຈາກໄມ້ສໍາເລັດຮູບທີ່ໄດ້ລົບລ້າງການອອກໃບອະນຸຍາດ ສົ່ງອອກແຕ່ທ້າຍປີ 2011.
ຄຳສັ່ງແນະນຳເພີ້ມເຕີມສະບັບນີ້ ມີຜົນສັກສິດ ນັບວັນທີ 17 ມິຖຸນາ 2016 ເປັນຕົ້ນໄປ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.